İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 165 Hüküm no: 104 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İskender’in boşandığı Mehmed Efendi b. Mustafa’da olan mehir alacağından dolayı açtığı davanın anlaşmayla sonuçlandığı İbrâ. Husûs-ı âti’l-beyânın mahâllinde istimâ‘ ve tahrîri için bu dâ‘îlerine hitâben buyruldu-yı şerîf vârid olmağın imtisâ[len] leh taraf-ı şer‘-i kavîmden Mevlânâ es-Seyyid İbrahim Efendi bi’t-taleb irsâl olunup ol dahi zeyl-i vesîkada muharrerü’l-esâmî Müslimîn ile mahmiye-i Galata’ya tâbi‘ kasaba-i Beşiktaş mahallâtından merhûm Kılıç Ali Paşa Sarayı mahallesinde sâkine Fâtıma bt. İskender nâm hatunun menziline varıp akd-i meclis-i şer‘ eyledikde mezbûre Fâtıma Hatun meclis-i ma‘kūd-ı mezbûrda işbu bâ‘isü’l-vesîka umdetü’l-hutebâ ve’l-ızâm Mehmed Efendi b. Mustafa mahzarında bi’t-tav‘i’s-sâf ikrâr ve i‘tirâf edip ben mûmâ-ileyh Mehmed Efendi’nin zevce-i menkûhası olup târih-i kitâbdan on beş gün mukaddem beni talâk-ı selâse ile tatlîk eyledikde zimmetinde ma‘kūdün-aleyh olan yirmi beş bin akçe mehr-i mü’eccelimi mezbûrdan da‘vâ ve taleb eyledikde ol dahi mehr-i mezkûrun on altı bin akçesini ikrâr mâ‘adâsının inkâr edip ve yine târih-i kitâbdan sekiz sene mukaddem mûmâ-ileyh Mehmed Efendi’ye bi-tarîkı’l-karz bir def‘a elli riyâlî guruş ve bir def‘a dahi yetmiş guruş def‘ ü teslîm ve bir def‘a dahi beynimizde ma‘lûm tahtabend binâsı için elli riyâlî guruş ve yine bir def‘a bakkāl deyni için yirmi guruş ki cem‘an yüz doksan riyâlî guruş hakkım olup onları dahi da‘vâ eyledikde zikrolunan yüz doksan guruşun ancak elli guruşu ikrâr mâ‘adâsını inkâr etmekle ben dahi ityândan âcize olmağın ba‘de’t-tahlîfi’ş-şer‘î mezbûr Mehmed Efendi’nin zimmetinde ikrârı mertebesi olan on altı bin akçe mehr-i mü’eccelim ve yine ikrâr eylediği elli guruş cem‘an yirmi bin akçe zimmetinde hakkım zâhir ve edâsı lâzım gelip ve bunlardan mâ‘adâ işbu müşârün-ileyh defterde mastûr ve beynimizde miskāli ve kıymetleri ma‘lûm bir altın-ı istefan ve bir sorguç ve üçayak bir çift la‘l küpe ve bir çift altın bilezik ve bir inci yaka ve bir sîm kutu ve bir sîm na‘leyn ve bir serâser yorgan ve bir minterî atlas yorgan ve iki altın sacayağı ve üç döşek yüzü ve altı dolma yastık yüzü ve otuz aded sahan ve bir kebîr sini ve bir civânkaşı sîm raht zikrolunan eşyâyı târih-i kitâbdan otuz sene mukaddem merkūm Mehmed Efendi bey‘ ve semenlerini kendi mesârifine sarf eyledi deyü da‘vâ etdiğimde da‘vâ-yı mezkûre üzerine bilâ-özr-i şer‘î otuz sene mürûru ikrârım ile müte‘ayyin olmağın müddet-i memnû‘a mürûru ile da‘vâdan men‘ olunmuş idim. Ve yine benim iznim yoğiken bundan akdem Hatîb Mehmed Çelebi nâm kimesneden yüz riyâlî guruş iktirâz ve mukābelesinde kendi mülküm olan bir mücevher ön altın kuşak ve bir çift altın bilezik rehin vaz‘ <> edip meblağ-ı mezbûr ile işbu hâzıra bi’l-meclis Kâtibe nâm Rusiyetü’l-asl bir câriye iştirâ etmiş idi. Hâlâ mezbûr Mehmed Efendi câriye-i mezkûreyi ba‘de’l-kabz ve yâhud semenini deyn-i mezbûr mukābelesinde mezbûr Hatîb Mehmed Çelebi’ye def‘ ve teslîmden sonra benim mülküm olan mezkûr kuşak ve bir çift bilezik ba‘de’l-fek bana def‘ ü teslîm ben dahi ahz u kabz eyledikden sonra zikri sebk eden da‘vâlardan fâriğa olup ve mezbûr Mehmed Efendi dahi da‘vâ eylemeyip benim zimmetime lâzım hukūkundan fâriğ olmak üzere beynimize muslihûn tavassut edip mezbûr Mehmed Efendi ile beynimizi ıslâh eylediklerinde ben dahi sâlifü’z-zikr yirmi bin akçe mehr-i mü’eccelim ve da‘vâ eylediğim yüz doksan guruşdan ikrâr eylediği elli guruş da‘vâsından ve defterde mastûr olan esvâb da‘vâsından ve bi’l-cümle bu ana gelince zevciyete müte‘allik ve beynimizde nikâh kā’im iken vâki‘ olan ahz u i‘tâya müte‘allik cemî‘ da‘vâdan fâriğa olup zimmetini ibrâ-i âmm-ı kātı‘u’n-nizâ‘la ile ibrâ ve ıskāt eyledim. Ba‘de’l-yevm sâlifü’l-beyân mehr-i mü’eccel ve karz ve esvâba müte‘allik da‘vâ ve nizâ‘ım yokdur. Eğer benden bizzât veyâ bi’l-vesâta da‘vâ zuhûr ederse lede’l-hükkâmi’l-kirâm mesmû‘a ve makbûle olmaya dediğini gıbbe’t-tasdîkı’ş-şer‘î mevlânâ-yı mezbûr mahâllinde tahrîr ba‘dehû meclis-i şer‘a gelip cânib-i şer‘den ma‘an irsâl olunan Hasan b. Veli nâm kimesne ile alâ-vukū‘ihî inhâ ve takrîr edecek vâki‘u’l-hâl bi’t-taleb ketb olundu. Fi’l-hâmis ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Şerefüddin Efendi el-hatîb bi Câmi‘-i Sinan Paşa, Abdülkerim Efendi b. Mehmed el-imâm, Mehmed Efendi b. Zülfikar el-imâm, Ahmed Efendi b. Mehmed el-kâtib, Murad Bey b. Rıdvan el-hammamî, Davud Bey b. Abdullah, Mehmed Çelebi b. Mahmud, Süleyman Bey b. Mehmed, Mustafa Beşe b. Veli, Ahmed Halîfe el-müezzin, Osman Ağa usta-i Hadîce vâlide Sultan.