İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 166 Hüküm no: 105 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabaş mahallesinden Kerime bt. Hüseyin ile Abdurrahman Çelebi b. Ahmed’in boşanma davası Hul‘ hıdâne? bilâ-nafaka infâka ta‘ahhüd. Mahmiye-i İstanbul’da Karabaş mahallesinde sâkine Kerîme bt. el-Hâc Hüseyin nâm hatun meclis-i şer‘-i hatîrde zevci bâ‘isü’l-vesîka Abdurrahman Çelebi b. Ahmed nâm kimesne mahzarında tâyi‘aten ikrâr ve takrîr-i kelâm edip zevcim mezbûrun zimmetinde mütekarrir ve ma‘kūdün-aleyh iki bin beş yüz akçe mehr-i mü’eccelim ile mahmiye-i mezbûrda Şeyh Muhyiddin mahallesinde vâki‘ beyne’l-ahâlî ma‘lûmü’l-hudûd zevcim mezbûr ile iştirâk-i seviy üzere mülkümüz olup bi-hesâb-ı terbî‘i bin yüz on dokuz buçuk zirâ‘ arsada olan nısf hisse-i şâyi‘am ve zimmetine lâzım gelen kadr-ı ma‘rûf nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl ve zevciyete müte‘allika da‘vâdan zimmetini ibrâ ve ıskāt eyledikden sonra mezbûrun firâşından benden mütevellide işbu hacr ve terbiyemde olan sagīre kızı Râbia nâm sagīreyi hakk-ı hıdâne tamamına değin bilâ-nafaka infâka ta‘ahhüd eyledim dedikde gıbbe’t-tasdîkı’ş-şer‘î bi’t-taleb ketb olundu. Fi’l-yevmi’s-sâmin ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Çelebi b. Mahmud, el-Hâc Ahmed b. Mahmud, Şükrullah b. Mustafa, Abdi Çelebi b. Hüseyin, Veli b. Mahmud, Baba Rasûl b. Rıdvan.