İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 167 Hüküm no: 106 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Halil’in Van Beylerbeyi Ahmed Paşa’nın vekili harcı olan Abdülbaki Bey’de olan alacaklarının muhallefatından ödenmesi için Abdulkadir Bey’e açtığı dava Yemîn. Mahmiye-i İstanbul’da Elvanzâde mahallesinde sâkin işbu bâ‘isü’l-kitâb Mehmed Çelebi b. Halil mahfil-i kazâda bi’l-fi‘il Van Beylerbeyisi olan emirü’l-ümerâ’i’l-kirâm Ahmed Paşa’nın vekîlharcı olup bundan akdem vefât eden Abdülbaki Bey’in muhallefâtına vâzı‘u’l-yed olan Abdülkadir Bey b. Osman mahzarında üzerine da‘vâ ve takrîr-i kelâm edip müteveffâ-yı mezbûr Abdülbaki Bey zimmetinde hâl-i hayatında yedimden müşterâ ve makbûz-ı ma‘lûmü’l-vezn şeker ve kahve semenlerinden dört bin yedi yüz on beş akçe hakkım olup meblağ-ı mezbûr bana deyni olduğunu şuhûd-ı udûl katında kirâren ve mirâren ba‘de’l-ikrâr vefât etmekle zimmetinde kalmış idi. Hâlâ müteveffâ-yı mezbûrun terekesinden taleb ederin suâl olunsun dedikde gıbbe’s-suâl mezbûr Abdülkadir Bey cevâbında müteveffâ-yı mezbûr Abdülbaki Bey’in terekesine vaz‘-ı yed eylediğini ikrâr lâkin müdde‘î-yi mezbûre vech-i mübeyyen üzere deyni olduğunu inkâr edicek müdde‘î-yi mezbûrdan müdde‘âsını mübeyyin beyyine taleb olundukda udûl-ı Müslimînden olup mahmiye-i merkūmede Mollagürânî kurbünde sâkin Yusuf Beşe b. Mehmed ve Salih Paşa mahallesinde sâkin Ramazan Ağa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Abdülbaki Bey hâl-i hayatında müdde‘î-yi mezbûrdan bin yüz on beş akçe kahve ve şeker bahâlarından zimmetimde deynim vardır deyü bizim huzûrumuz[da] ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâitü’l-kabûl şehâdetleri makbûle olmağın meblağ-ı mezbûr dört bin yedi yüz on beş akçeyi müteveffâ-yı mezbûr Abdülbaki Bey’in hâl-i sıhhatinde ahz u kabz veyâ hîbe veyâ âhara havâle ve turûk-ı şer‘iyeden bir tarîk ile zimmetini ibrâ eylemediğine mezbûr Mehmed Çelebi’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince meblağ-ı mezbûr dört bin yedi yüz on beş akçeyi müdde‘î-yi mezbûr Mehmed Çelebi’ye müteveffâ-yı merkūmun terekesinden edâ ve teslîme merkūm Abdülkadir Bey’e tenbîh birle mâ-vaka‘a bi’t-taleb ketb olundu. Fi’l-yevmi’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: el-Hâc Ahmed Çelebi b. Mahmud, Abdi Çelebi b. Hüseyin, Rasûl Bey b. Rıdvan, Ahmed b. Abdülcabbar, Mehmed b. Mustafa.