İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 168 Hüküm no: 108 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hekim Yorgi v. Yani’ye fıtık tedavisi yaptıracak olan Melvan b. Kazer’in tedavi sırasında meydana gelecek olumsuz bir durumda hekimin sorumlu olmayacağı Mahmiye-i İstanbul’da Yenibahçe kurbünde Sultan mahallesinde sâkin Melvan v. Kazer nâm Ermeni mahfil-i kazâda Yorgi v. Yani nâm tabîb-i hâzık muvâcehesinde bi’t-tav‘ ve’l-ihtiyâr ikrâr ve takrîr-i kelâm edip hâlâ mübtelâ olduğum maraz-ı fıtıka mu‘âleceye eczâ-yı hâdde-i nâfi‘a ile fatk u ratk ve vasl ü kat‘ ve hark ve iltiyâma safâ-yı bâl ve tayyib-i hâtır ile tabîb-i mezbûra nefsimi teslîm ve mu‘âlece için yirmi esedî guruş mezbûrun yedine def‘ eyledim. Eğer mukadderât-ı ilâhiye sünûh ve zuhûr edip hîn-i mu‘âlecede ve esnâ-yı müdâvâtda tabîb-i mezbûrun yedinde helâk olursam veresemden ve sâir efrâd-ı âferideden bir ferd dem ü diyetim talebi ile tabîb-i mezbûru rencîde etmesin dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Recebi’l-ferd sene [10]72. Şuhûdü’l-hâl: Şükrullah b. Mustafa, Rasûl b. Rıdvan, Abdi Çelebi b. Hüseyin, Veli b. Mahmud, Pîrî b. Hüseyin.