İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 169 Hüküm no: 109 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Kabasakal mahallesinden Meryem bt. Aynî ile Hasan Beşe’nin boşanma davası Sulh ve ibrâ. Mahmiye-i İstanbul’da Kabasakal mahallesi sâkinelerinden Meryem bt. Aynî nâm hatun meclis-i şer‘-i hatîr-i lâzımü’t-tevkīrde zevci işbu bâ‘isü’l-kitâb Hasan Beşe b. Hüseyin mahzarında ikrâr ve takrîr-i kelâm edip zevcim mezbûr Hasan Beşe’nin ben zevcesi olup beni talâk-ı bâyin ile tatlîk etmeğin zimmetinde mütekarrir ve ma‘kūdün-aleyh olan sekiz yüz akçe mehr-i mü’eccelim ve nafaka-i iddet ve me’ûnet-i süknâmı mezbûrdan da‘vâ ve taleb eylediğimde beynimizde münâza‘ât-ı kesîre ve muhâsamât-ı adîde vâki‘ olmuş idi. El-hâletü-hâzihî vesâtet-i muslihîn ile zevcim mezbûr Hasan Beşe benimle dört yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr dört yüz akçeyi mezbûr Hasan Beşe yedinden tamamen ahz u kabz edip zevciyete müte‘allika âmme-i da‘vâ ve mutâlebât ve eymân ve muhâsamâtdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Recebi’l-ferd sene [10]72. Şuhûdü’l-hâl: Cafer Çavuş el-mübâşir, Mehmedî Çelebi b. Hüseyin, Şükrullah b. Mustafa, Ahmed b. Abdülcabbar.