İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 169 Hüküm no: 110 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Apostol v. Papa Dimo’nun alacağı olan parayı ödemesi için Totoş v. İstorlo’ya tenbih edildiği İkrâr ve ibrâ, meblağ: 38.000. Mumcu tâifesinden hâfızü’l-vesîka Apostol v. Papa Dimo nâm zimmî meclis-i şer‘de Totoş v. İstorlo nâm zimmî muvâcehesinde üzerine da‘vâ ve takrîr-i kelâm edip mukaddemâ mezbûr Totoş’a seksen bin akçe sermâye verdikden sonra on iki bin akçesin alıp ba‘de küllî hesâb zimmetinde altmış sekiz bin akçe hakkım bâkī kalmış idi. El-hâletü-hâzihî meblağ-ı mezbûrun otuz bin akçesinden mezbûrun zimmetini ibrâ ve ıskāt edip zimmetinde olan otuz sekiz bin akçesini mezbûrdan taleb ederim suâl olunsun dedikde gıbbe’s-suâl mezbûr Totoş cevâbında fi’l-vâki‘ müdde‘î-yi mezbûr Apostol zimmîye mukaddemâ ba‘de küllî hesâb altmış sekiz bin akçe deynim olup otuz bin akçesinden zimmetimi ibrâ ve ıskāt edip zimmetimde otuz sekiz bin akçe hakkı bâkī kaldı deyü ikrâr edecek ikrârı mûcebince meblağ-ı mezbûr otuz sekiz bin akçeyi müdde‘î-yi mezbûra edâ ve teslîme mezbûr Totoş’a tenbîh birle mâ-vaka‘a bi’t-taleb ketb olundu. Fi’s-sâmin ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Müstakim Çavuş el-mübâşir, Hüseyin Efendi el-Burûsî, Keşfî Mustafa Efendi, Şükrullah b. Mustafa, Abdi Çelebi b. Hüseyin.