İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 181 Hüküm no: 126 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti Hatun’un vakfettiği evin süknâsı Tevcîh-i süknâ. Mahmiye-i İstanbul’da Monla Ahaveyn mahallesinde sâkin iken vefât eden Mehmed Efendi b. Rüstem’in sulbî oğlu işbu râfi‘u’l-kitâb Abdullah Efendi meclis-i şer‘de merhûme Sitti Hatun nâm sahibetü’l-hayr vakf ve süknâsını rûhi’çün külle yevm üç kerre sûre-i ihlâs tilâvet etmek üzere ulemâdan meskene muhtâc bir recül-i âlime şart ve ta‘yîn edip mahalle-i mezbûrede vâki‘ bir tarafdan Fazlullah Efendi mülküne ve bir tarafdan Abdülbaki Çelebi mülküne ve bir tarafdan Sâre Hatun bt. Mehmed mülküne ve bir tarafdan tarîk-i hâssa müntehî ve mahdûd menzile şart-ı vâkıfe mûcebince tevcîh-i hâkim-i şer‘le babamız mezbûr Mehmed Efendi hâl-i hayatında mutasarrıf iken harâba müşrif oldukda bi’l-izni’ş-şer‘î ma‘rifet-i mütevellî ve kendi mâlı ile nefsi’çün mülk olmak üzere bir bâb tahtânî oda ve bir sofa ve bazı ebniye ihdâs eyledikden sonra ihdâs eylediği ebniyeyi bin elli dokuz Şevvali yedinci günü târihiyle mahmiye-i mezbûrede hilâfeten müvellâ olan Abdülbaki Efendi b. Osman taraf-ı şer‘den târih-i mezkûrda küttâb-ı mahkemeden Hüseyin Efendi’yi irsâl edip ol dahi müceddeden ihdâs eylediği ebniyeyi hasbî mütevellî olan Abdullah Efendi b. eş-Şeyh Ali huzûrunda keşf ve yirmi bir bin yedi yüz elli sekiz akçeye tahmîl olduğu ol târihde mi‘mâr ve ehl-i vukūf ihbârları ile işbu yedimde olan keşf hücceti mûcebince tahrîr etdirmişidi. Hâlâ babam mezbûr Mehmed Efendi vefât edip ihdâs eylediği ebniye-i mezkûre ırsen bana intikāl eylediğinden mâ‘adâ ben dahi ulemâdan olmağla menzil-i mezbûr kıbel-i şer‘den bana tevcîh olunmak murâdımdır dedikde fi’l-vâki‘ mezbûr Abdullah Efendi süknâya eşedd-i ihtiyâcla muhtâc olmağla cânib-i şer‘den menzil-i mahdûd-ı mezbûr mezbûra tevcîh olunup işbu hurûf li-ecli’t-temessük ketb olundu. Fi’l-yevmi’s-sâlis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Keşfî Mustafa Efendi, Fahrü’l-kuzât Mehmed Efendi, el-Hâc Ahmed b. Mahmud, Hızır b. Abdünnebi, Şükrullah b. Mustafa, Mustafa b. İsa, Veli b. Mahmud, Hasan b. Mustafa, Rasûl b. Rıdvan.