İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 182 Hüküm no: 128 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silivrikapı İbrahimpaşa mahallesinden Hatice bt. Sinan ile Ramazan b. Murad’ın boşanma davası Hul‘. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Silivrikapısı dâhilinde İbrahim Paşa mahallesinde vâki‘ merhûm Bali Ağa Mescid-i şerîfi’ne varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘ eyledikde mahalle-i mezbûrede sâkine Hadîce bt. Sinan nâm hatun zâtı yine mahalle-i mezbûre sükkânından Ahmed Bey b. Receb ve el-Hâc Abdülkadir b. Halil nâm kimesneler şehâdetleri ile mu‘arrefe olan mezbûr Hadîce meclis-i ma‘kūd-ı mezbûrda zevci işbu bâ‘isü’l-kitâb Ramazan b. Murad nâm kimesne mahzarında ikrâr ve takrîr-i kelâm edip zevcim mezbûr Ramazan zimmetinde mütekarrir ve ma‘kūdün-aleyh olan iki bin beş yüz akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr Ramazan ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde tahrîr ba‘dehû ma‘an irsâl olunan Halil b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’s-sâbi‘ ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Mustafa Efendi b. İbrahim el-imâm, Mustafa Beşe b. Mustafa, el-Hâc Abdülkadir b. Halil, Abdi Çelebi b. İskender, Ahmed Bey b. Receb, el-Hâc Mustafa b. Ali, Mehmed Çelebi b. Hüseyin, Ali Çelebi el-müezzin, Mehmed Çelebi el-müezzin.