İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 183 Hüküm no: 129 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu’da ölen Dergâh-ı âlî yeniçerilerinden Kara Mustafa’nın küçük çocuklarına vasî tayini Vesâyet. Dergâh-ı âlî yeniçerilerinin on dokuz sekbânlara mahsûs oda ahâlîsinden olup vilâyet-i Anadolu’da medîne-i Kastamonu’da sâkin iken vefât eden Kara Mustafa Beşe nâm râcilin evlâd-ı sıgārı İsmail ve Mehmed ve İbrahim’in vasîyy-i şer‘îleri olmağla sıgār-ı mezbûrûnun babalarında intikāl eden yirmi beş bin akçeye vâzı‘u’l-yed olan oda-i mezbûr ahâlîsinden İbrahim Beşe vefât etmeğin sıgār-ı mezbûrûnun mâllarını müteveffâ olan vasîyy-i mezbûrun terekesinden ahz u kabza bir vasî nasbından lâzım ve işbu bâ‘isü’l-vesîka oda-i mezbûre ahâlîsinden Hamza Beşe b. Hüseyin nâm kimesne her vechile vesâyet-i mezbûreye ehil olduğu zeyl-i rakīmde esâmîleri mastûr Müslimîn lede’ş-şer‘ ihbâr eylediklerinde hâkim-i muvakkı‘-ı kitâb ve tûbâ lehû ve hüsnü-meâb hazretleri mezbûr Hamza Beşe’yi sıgār-ı mezbûrûnun tesviye-i umûrlarına kıbel-i şer‘den vasî nasb ve ta‘yîn eyledikde ol dahi vesâyet-i mezbûreyi kabûl ve hidemâtını edâya müte‘ahhid olmağın mâ-vaka‘a bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Hacı Hüseyin b. Receb, Mehmed Beşe b. Hasan aşçı, Ali b. Mustafa, Mustafa b. Muslu vekîlharc, Şükrullah b. Mustafa.