İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 188 Hüküm no: 136 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşemsettin mahallesinde bulunan Ayşe Hatun’a ait evin Fâtıma Hatun tarafından satın alınması Mülknâme Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Ak Şemseddin mahallesinde sâkine Âişe Hatun bt. Hüseyin’in menziline varıp zeyl-i rakīmde esâmîleri mastûr olan Müslimîn huzûrunda akd-i meclis-i şer‘-i kavîm eyledikde zâtı sadrî oğlu Osman Çelebi b. Ömer ve el-Hâc Ebûbekir b. Abdullah ta‘rîfleri ile mu‘arrefe oldukdan sonra mezbûre Âişe Hatun meclis-i ma‘kūd-ı mezbûrda işbu râfi‘atü’l-kitâb Fâtıma bt. Mustafa nâm bikr-i bâliğa mahzarında tâyi‘aten ikrâr ve takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ iki tarafdan mahalle-i mezbûre imâmına meşrûta menzile ve bir tarafdan ba‘zan Saraylı Firuz Hatun mülkü ve ba‘zan mahalle-i mezbûre mescid-i şerîfine mevkūf menzile ve bir tarafdan tarîk-i âmma müntehî ve mahdûd olup iki bâb fevkānî odaları ve bir bâb tahtânî odayı ve bir su kuyusunu ve kenîfi ve zât-ı eşcâr-ı müsmire havluyu müştemil olan menzilimi kâffe-i hukūk ve merâfıkı ve âmme-i tevâbi‘ ve levâhıkı ile mûmâ-ileyhâ Fâtıma Hatun’a râyic fi’l-vakt yirmi sekiz bin akçeye bâtten bey‘ ve teslîm ol dahi minvâl-i muharrer üzere mâlıyla nefsi’çün iştirâ ve tesellüm ve kabûl eyledikden sonra semeni olan meblağ-ı mezbûr yirmi sekiz bin akçeyi bi’t-tamam ve’l-kemâl mûmâ-ileyhâ Fâtıma Hatun yedinden alıp kabz eyledim. Ba‘de’l-yevm menzil-i mahdûd-ı mezbûr mûmâ-ileyhâ Fâtıma’nın mülk-i müşterâsıdır. Keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î mevlânâ-yı mezbûr mahâllinde tahrîr ba‘dehû ma‘an irsâl olunan Mehmed b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’r-râbi‘ min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Fahrü’l-müderrisîn Şemseddin Efendi b. eş-Şeyh Abdullah el-Ensârî, Fahrü’l-müderrisîn Mehmed Efendi b. Şemseddin Efendi el-mezbûr, Fahrü’l-eimme Abdurrahman Efendi b. eş-Şeyh Ahmed, el-Hâc Ebûbekir b. Abdullah, Ahmed Beşe b. Mehmed, Mustafa Efendi b. Yahya er-râcil, Esad Çelebi b. Yahya Efendi, Hasan Beşe b. Hüseyin, Mehmed Çelebi b. İbrahim Keçezâde, Canbaz Bodur Mehmed, el-Hâc İsmail b. Şahin, el-Hâc Mustafa b. Sefer.