İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 189 Hüküm no: 137 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşemsettin mahallesinden Dilsiz Ümmühani Hatun’un kiralama yoluyla satın aldığı ev İstiglâl Husûs-ı âti’l-beyânın mahâllinde tahrîri’çün <> iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Ak Şemseddin mahallesinde sâkine Âişe Hatun bt. Hüseyin’in menziline varıp zeyl-i rakīmde esâmîleri mastûr olan Müslimîn huzûrunda akd-i meclis-i şer‘ eyledikde bundan akdem mahalle-i mezbûrede Karabaş mahallesinde sâkin iken vefât eden Mustafa b. Abdülkadir’in sulbiye kebîre kızı olup zâtı fahrü’l-eimme Abdurrahman Efendi b. eş-Şeyh Ahmed ve el-Hâc Ebûbekir b. Abdullah ta‘rîferi ile mu‘arrefe olan Fâtıma Hatun nâm bikr-i bâliğa meclis-i mezbûrda li-ebeveyn karındaşı bîzebân Mehmed nâm sagīrin vasîyy-i şer‘îsi ve vâlidesi olup işâret-i ma‘hûdesiyle nutk makāmına kāime olan işbu râfi‘atü’l-vesîka bîzebân Ümmühan Hatun bt. Ali mahzarında tâyi‘aten ikrâr ve takrîr-i kelâm edip akd-i âtî sudûruna dek silk-i mülkümde olup ve zikrolunan Ak Şemseddin mahallesinde vâki‘ iki tarafdan mahalle-i mezbûr Akşems imâmına meşrûta menzile ve bir tarafdan ba‘zan Saraylı Firuz Hatun mülkü ve ba‘zan mahalle-i mezbûre mescid-i şerîfi vakfı olan menzile ve bir tarafdan tarîk-i âmma müntehî ve mahdûd olan cemî‘ menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık vasîyy-i mezbûre bîzebân Ümmühani Hatun’a istiğlâl-i şer‘î tarîki üzere râyic fi’l-vakt on beş bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi vasîsi olduğu li-ebeveyn karındaşım sagīr-i mezbûr bîzebân Mehmed’in mâlıyla vesâyeten işâret-i ma‘hûdesiyle minvâl-i muharrer üzere iştirâ ve tesellüm ve kabûl edip semen-i olan meblağ-ı mezbûr on beş bin akçeyi tamamen vasîyy-i mezbûr yedinden alıp kabz eyledikden sonra yine menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzi’l-mer‘î târih-i kitâbdan bir sene tamamına dek bin beş yüz akçe ücret-i mü’eccele-i mev‘ûde ile vasîyy-i mezbûre bîzebân Ümmühani Hatun’dan istîcâr ve tesellüm ve kabûl ol dahi işâret-i ma‘hûdesiyle minvâl-i muharrer üzere bana îcâr ve teslîm eyledi dedikde vasîyy-i mezbûre bîzebân Ümmühani Hatun işâret-i ma‘hûdesiyle minvâl-i muharrer üzere bana îcâr ve teslîm eyledi dedikde vasîyy-i mezbûre bîzebân Ümmühani Hatun işâret-i ma‘hûdesiyle mukırre-i mezbûreyi vicâhen tasdîk ve şifâhen tahkīk eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Mehmed b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: es-Sâbıkūn.