İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 190 Hüküm no: 138 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşemsettin mahallesinde Osman Çelebi’nin babasından kalan ev hissesini annesine satışı Mülknâme. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Ak Şemseddin mahallesinde vâki‘ zikri câ’î menzile varıp zeyl-i rakīmde esâmîleri mastûr Müslimîn huzûrunda akd-i meclis-i şer‘ eyledikde bundan akdem mahalle-i mezbûrede sâkin iken vefât eden Ömer Çelebi nâm kimesnenin verâseti zevce-i metrûkesi Âişe Hatun bt. Hüseyin ile sulbî kebîr oğlu Osman Çelebi’ye münhasıra olduğu şer‘an zâhir ve mütehakkık ve bâhir oldukdan sonra mezbûr Osman Çelebi meclis-i ma‘kūd-ı mezbûrda vâlidesi işbu râfi‘atü’l-kitâb mezbûre Âişe Hatun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan Seher bt. Abdullah ve ba‘zan zevci Mehmed b. Abdullah mülküne ve bir tarafdan el-Hâc İbrahim mülküne ve bir tarafdan ba‘zan imâma mevkūf menzile ve ba‘zan Âişe Hatun mülküne ve bir tarafdan tarîk-i âmma müntehî üç bâb fevkānî oda ve bir sofa ve bir dehlize ve altlarında mahtab ve su kuyusunu ve zât-ı eşcâr-ı cüneyneyi müştemil olup babam müteveffâ-yı mezbûrdan intikāl eden menzilde olan sekiz sehimden yedi sehmi hisse-i şâyi‘amı vâlidem mûmâ-ileyhâ Âişe Hatun’a bi-cümleti’t-tevâbi‘ ve’l-levâhık râyic fi’l-vakt kırk bin akçeye bâtten bey‘ ve teslîm ol dahi minvâl-i muharer üzere iştirâ ve tesellüm ve kabûl eyledikden sonra semeni olan meblağ-ı mezbûru tamamen vâlidem mezbûre Âişe Hatun yedinden alıp kabûl eyledim. Ba‘de’l-yevm menzil-i mezbûrda alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: es-Sâbıkūn.