İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 191 Hüküm no: 140 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtaminare mahallesinden Sultan bt. Mehmed’in varislerinin Katalan cemaatinden Abraham v. Musa’da olan paralarının alınması Mahmiye-i İstanbul’da Tahtaminâre mahallesinde sâkine iken bundan akdem vefât eden Sultan bt. Mehmed nâm hatunun verâseti sadrî oğlu Mustafa’nın kebîre kızı Rahime nâm hatuna ve sagīre kızları Fâtıma ve Âişe’ye münhasıra olduğu şer‘an zâhir ve müte‘ayyin oldukdan sonra sagīretân-ı mezbûretânın kıbel-i şer‘den mansûbe vasîleri Sultan bt. Yahya nâm hatun ile mezbûre Rahime Hatun mahfil-i kazâda Katalan cemâ‘atinden Abraham v. Musa nâm Yahûdî muvâcehesinde her biri asâleten ve vesâyeten üzerine da‘vâ ve takrîr-i kelâm edip müteveffât-ı mezbûre Sultan’ın mezbûr Abraham zimmetinde târih-i kitâbdan dört sene mukaddem cihet-i karz-ı şer‘îden yüz elli kıt‘a riyâlî guruş hakkı olup hatta zimmetinde yüz elli riyâlî guruş hakkı olduğunu şuhûd-ı udûl mahzarında ikrâr dahi eyledikden sonra kable’l-ahz mûrise-i mezbûr Sultan vefât ve meblağ-ı mezbûr ırsen bize intikāl etmekle taleb ederiz suâl olunsun dediklerinde gıbbe’s-suâl ve akībe’l-inkâr mezbûretândan müdde‘âlarını mübeyyin beyyine taleb olundukda udûl-i Müslimînden olup mahalle-i mezbûre sükkânından Mustafa b. Abdüsselam ve İbrahim b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Abraham müteveffât-ı merkūme Sultan’a cihet-i karz-ı şer‘îden zimmetinde yüz elli kıt‘a riyâlî guruş deynim vardır deyü bizim huzûrumuzda ikrâr ve bizi şâhid eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı merkūmânı tezkiye için kıbel-i şer‘den irsâl olunan Kastamonî Mehmed Efendi varıp mahalleleri ahâlîsinden Mehmed Odabaşı b. Süleyman ve Bayram b. Abdünnebi ve Mehmed Halîfe b. Abdullah ve Yusuf b. Abdullah ve Hüseyin Beşe b. Mahmud ve Mehmed b. Hüseyin nâm kimesnelerden suâl eyledikde her biri merkūmânın hüsn-i hâllerini haber verdiğini mevlânâ-yı mezbûr mahâllinde tahrîr ba‘dehû ma‘an irsâl olunan Gazanfer b. Tevekkül ile meclis-i şer‘a gelip alâ-vukū‘ihî inhâ ve takrîr eyledikden sonra mûcebince meblağ-ı mezbûrun elli riyâlî guruşunu mezbûre Rahime Hatun’a ve yüz riyâlî guruşunu vasîyy-i mezbûreye edâ ve teslîme merkūm Abraham tenbîh birle mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: İbrahim Çavuş b. Mahmud el-mübâşir, Musa b. Abdullah, el-Hâc Ahmed b. Mahmud, Şükrullah b. Mustafa, Rasûl b. Rıdvan.