İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 192 Hüküm no: 141 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultanselim mahallesinden Ayşe Hatun bt. Ali Bey tarafından Çerkes asıllı cariye Lütfiye’nin azat edildiği Mahmiye-i İstanbul’da Mesih Paşa mahallesi sâkinlerinden fahrü’l-akrân Mustafa Bey b. Ali nâm kimesne mahfil-i kazâda Sultan Selim mahallesinde sâkine Âişe Hatun ibnetü Ali Bey tarafından husûs-ı âti’l-beyâna vekîl olup mezbûreyi ma‘rifet-i şer‘iye ile ârifân olan İsmail Bey b. Abdullah ve Ali Beşe b. Mehmed şehâdetleri ile vekâleti sâbite olan zevci işbu bâ‘isü’l-kitâb el-Hâc Yusuf b. Bünyad nâm kimesne mahzarında üzerine takrîr-i da‘vâ edip zevcim İsmihan Hatun ibneti Ahmed işbu hâzıra bi’l-meclis kara kaşlı ak saçlı sağ cânibinde tâ‘ûn cerâhati mevcûd Çerkesiyetü’l-asl Latîfe bt. Abdullah nâm sagīre câriyeyi bundan akdem elli guruşa iştirâ eyledikden sonra câriye-i mezkûreyi bana yine semen-i mezbûra bey‘ ve teslîm edip mülkümde iken iznim yoğiken câriye-i mezkûrenin bey‘i sahîh olmamağla bana teslîm olunması matlûbumdur dedikde gıbbe’s-suâl vekîl-i mezbûr cevâbında fi’l-vâki‘ müvekkilem mezbûre Âişe Hatun câriye-i merkūmeyi semen-i mezbûra iştirâ eyledi ve lâkin câriye-i mezkûre Latîfe’yi müdde‘î-yi mezbûr Mustafa Bey’in zevcesi mezbûre İsmihan Hatun zevci merkūm Mustafa Bey’e bey‘ etmezden mukaddem i‘tâk edip hâlâ sagīre-i mezbûre Latîfe sâir harâ’ir-i asliyât gibi hürre olup hatta mezbûr İsmihan Hatun minvâl-i muharrer üzere mahzar-ı Müslimînde ikrâr dahi eylemişdir deyü mukābele edecek gıbbe’l-istintâk ve akībe’l-inkâr ve isr-i talebi’l-beyyine mahmiye-i mezbûrede Hoca Üveys mahallesinde sâkin Mehmed b. Hasan ve Saime Hatun bt. Hasan ve Âişe Hatun bt. Veli ve Emine Hatun bt. Durmuş nâm hatunlar meclis-i şer‘a li-ecli’ş-şehâde hâzırûn olup isre’l-istişhâdi’ş-şer‘î fi’l-vâki‘ evsâf-ı mezkûr ile mevsûfe olan câriye-i Latîfe’nin mâlikesi olan mezbûre İsmihan Hatun bize câriyem sagīre-i merkūme Latîfe’yi mülkümden ihrâc ve i‘tâk eyledim deyü bizim huzûrumuzda ikrâr eyledi biz bu husûsa bu vech üzere şâhidleriz şehâdet dahi ederiz her biri edâ-i şehâdet-i şer‘iye eylediklerinde gıbbe ri‘âyet-i şerâitü’l-kabûl şehâdetleri makbûle olmağın mûcebince sagīre-i merkūme Latîfe’nin hürriyetine hükm birle vâki‘u’l-hâl bi’t-taleb ketb olundu. Fî-gurreti Recebi’l-ferd li-sene isneyn ve seb‘în ve elf. Şuhûdü’l-hâl: Abdülkerim Çelebi b. İbrahim, Mehmed b. Ali el-müezzin bi Câmi‘-i Sultan Selim, Bayram b. Mehmed, Siyavuş Halîfe b. Abdullah, Ebûbekir b. Mahmud, Hüseyin b. Ahmed, Mahmud b. Şaban, Ramazan b. Ali.