İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 193 Hüküm no: 142 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odunkapı Demirtaş mahallesinden Paludeci Abdal b. Mehmed borcu karşılığında aletlerini Ali b. Mehmed’e vermesi Mahmiye-i İstanbul’da Odunkapısı dâhilinde Timurtaş mahallesinde sâkin Abdal b. Mehmed nâm pâlûdeci meclis-i şer‘de işbu râfi‘u’l-kitâb Ali b. Mehmed nâm kimesne mahzarında tâyi‘an ikrâr ve takrîr-i kelâm edip akd-i âtî sudûruna dek silk-i mülkümde olup pâlûdeci âlâtından mecmû‘u doksan üç vakıyye olmak üzere yirmi yedi bakraç ve yirmi beş nühâs kefçe ve bir kebîr tas ve bir kebîr kazgan ve bir kebîr kefçeyi bi safka-i vâhide on üç bin altı yüz akçeye ve sâir beynimizde aded ve cinsi ma‘lûm cehâleti nâfî pâlûdeci âlâtın dahi bi safka-i vâhide üç bin akçe ki cem‘an on altı bin altı yüz akçeye mezbûr Ali’ye bâtten bey‘ ve teslîm ol dahi yedimden iştirâ ve tesellüm ve kabûl eyledikden sonra semeni olan meblağ-ı mezbûr on altı bin altı yüz akçeyi müşteri-yi mezbûr Ali’ye zimmetimde kara üzüm bahâsından deynim olan on altı bin altı yüz akçeye takās ol dahi mukāssa ve kabûl etmeğin bâlâda mezkûr olan pâlûdeci âlâtı ba‘de’l-yevm mezbûr Ali’nin mülküdür benim alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed b. Ramazan el-attar, Helvâcı Abdülkerim b. Mehmed, Gedik Ali b. Helvâcı b. Mustafa, Mehmed Çelebi b. Ramazan.