İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 193 Hüküm no: 143 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtibkasım mahallesinden Ayşe bt. Abdülbaki sahib olduğu dörtte bir hisse yanık ev arsasını Bağdasar v. Safer’e satması Mülknâme. Dârü’s-saltanati’s-seniyye-i Kostantıniyyeti’l-mahmiye’de Kâtib Kasım mahallesinde sâkine Âişe bt. Abdülbaki tarafından zikri âtî rub‘ hisseyi bey‘ ve kabz-ı semene vekîl olup mezbûrenin zâtını ma‘rifet-i şer‘iye ile ârifân İbrahim Efendi b. Mehmed el-imâm ve Nasuh Halîfe b. el-Hâc Osman şehâdetleri ile şer‘an vekâleti sâbite olan zevci Ali Bey b. Mehmed meclis-i şer‘de işbu bâ‘isü’s-sifr Bağdasar v. Safer mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafı ba‘zan Delot nâm Ermeni mülküne ve ba‘zan Kirkor menziline ve bir tarafı müşteri-yi mezbûr mülküne ve bir tarafı Derviş v. Safer menziline ve bir tarafı tarîk-i âmma müntehî muhterik menzil arsasının rub‘u müvekkilim mezbûrenin selâse erbâ‘ı mezbûr Bağdasar’ın mülkü olmağla hâlâ müvekkilem mezbûrenin arsa-i mesfûrede olan rub‘ hisse-i şâyi‘asını vekâlet-i mahkiyem hasebiyle bâtten merkūm Bağdasar’a yirmi bin fıddî râyic fi’l-vakt akçeye bey‘ ve teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûru bi’t-tamam mezbûr Bağdasar yedinden vekâleten ahz u kabz eyledim ba‘de’l-yevm müvekkilem mezbûrenin rub‘ hisse-i şâyi‘ası merkūm Bağdasar’ın mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Ahmed Halîfe b. Yahya, Sefer Çelebi b. Abdullah, Seyyid el-Hâc Mehmed b. Hâmid, Mustafa b. Ömer, el-Hâc Mehmed, Mustafa b. Ömer, Mustafa b. Yusuf, Şükrullah b. Mustafa, Abdi Çelebi b. Hüseyin, Mehmed b. Ramazan.