İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 194 Hüküm no: 145 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yirmi yedinci ağa bölüğüne mahsus odanın mühimmatına vakfedilen paradan verilen borca kefil olunması Kefâlet Kasaba-i Mudanya muzâfâtından Tirilye nâm karye ahâlîsinden Panayot v. Yeraki ve Argiros v. Prakos ve Kostantin v. Salamon ve Nikola v. Todori ve Kostantin v. Sarasados ve Manol v. Orgiro ve Kostantin v. Zororni ve Papa İstavanos Serabayık ve Kiryazi v. İstrani ve Koş v. Rugoz ve Dimitri v. Praşkova nâm zimmîler kendi taraflarından asâlaten ve sâirleri taraflarından husûs-ı âtîye vekîl olup bi-mâ hüve nehcü’s-sübût vekâletleri sâbite olmağla vekâleten meclis-i şer‘-i hatîrde yirmi yedinci ağa bölüğüne mahsûs odanın mühimmâtına mevkūfe nukūdun mütevellîsi hâfızü’l-kitâb odabaşısı Hüseyin Beşe b. Mehmed mahzarında her biri ikrâr ve takrîr-i kelâm edip bizim ve müvekkillerimizin vakf-ı mezbûra karz-ı şer‘îden iki bin riyâlî guruş ile semenleri târih-i kitâb şehri gurresinden üç yüz altmış gün tamamına dek müvekkilimiz mütevellî-yi mezbûr yedinden müşterâ ve makbûz iki samur nâfe kürk ile nev‘ ve zirâ‘ı beynimizde ilm-i şer‘î ile ma‘lûm çuka bahâsından olan dört yüz riyâlî guruş deynim olup bizler ve müvekkillerimizden her biri âharın zimmetine lâzım gelen meblağı emr ve kabûlü hâviye vekâlet-i sahîha ile kefîl olduk dediklerinde gıbbe’t-tasdîk oda-i mezbûre neferâtından işbu hazır olan Mehmed Beşe b. Abdullah nâm kimesne dahi meclis-i mezbûrda mütevellî-yi mezbûr Hüseyin Beşe mahzarında ikrâr edip min-ba‘d iki bin riyâlî guruş asl-ı mâl ve dört yüz riyâlî guruş semen-i mezbûra ben dahi emr ve kabûlü hâviye kefâletle kefîl oldum dedikde mâ hüve’l-vâki‘ bi’t-taleb ketb olundu. Fi’s-sâmin ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Sâbıkā Sekbânbaşı Mehmed Ağa, Murtaza Beşe B 27, el-Hâc Ahmed Beşe b. Abdullah, Kadri Efendi b. Yahya, Halil Beşe b. Veli, el-Hâc Ali b. el-Hâc Mustafa, Halil Beşe seroda K. 26.