İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 195 Hüküm no: 146 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih’e mirası için vasî tayin edilen annesi Ümmühani bt. Mehmed’in evlenecek olmasından dolayı Hasan b. Hızır’ın yeni vasî tayin edildiği Vesâyet ve nezâret. Kasaba-i Yalakâbad’da sâkin iken vefât eden Ali Efendi’nin sulbî sagīr oğlu Salih’in babası müteveffâ-yı mezbûr ile li-ebeveyn kız karındaşı Âişe’den bi-tarîkı’l-münâsaha intikāl eden yedi bin akçe hissesini hıfz için kıbel-i şer‘den vasî nasb olunan vâlidesi Ümmühani bt. Mehmed nâm hatun nefsini âhara tezvîc eyledikden sonra âhar diyâra gideceği sikāt-ı Müslimîn ihbârı ile sâbit ve zâhir oldukda azl ve yerine mahmiye-i İstanbul’da Sultan Selim Han Câmi‘-i şerîfi kurbünde sâkin olup vesâyete her vechile ehil ve lâyık olduğu yine sikāt-ı Müslimîn ihbârı ile sâbit ve zâhir olan hâfızü’l-kitâb Hasan Dede b. Hızır kıbel-i şer‘-i mutahhardan vasî nasb olundukda ol dahi kabûl ve hizmetini edâya ta‘ahhüd edip meblağ-ı mezbûr yedi bin akçe vasîyy-i mezbûra teslîm olundukdan sonra mezbûr Ümmühani Hatun dahi meblağ-ı mezbûra nâzıra nasb ve ta‘yîn olundukda ol dahi nezâret-i merkūmeyi kabûl ve hizmetini edâya ta‘ahhüd etmeğin mâ-vaka‘a bi’t-taleb ketb olundu. Fi’s-sâmin ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Abdülkadir Çelebi el-Burûsî, Keşfî Mustafa Efendi el-kâtib, Ahmed Çelebi b. Mahmud, Şükrullah b. Mustafa, Abdi Çelebi b. Hüseyin.