İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 196 Hüküm no: 148 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Mehmed’in Yahudi Heron’dan alacağı olan para miktarı konusunda anlaşıldığı Sulh ve ibrâ. Mahmiye-i İstanbul’da Ayasofya-i Kebîr kurbünde hâlâ kāimmakām hazretlerinin saray-ı âlilerinde mütemekkin İbrahim Bey b. Mehmed nâm kimesne meclis-i şer‘de işbu hâmilü’s-sifr Zeytun cemâ‘atinden Heron v. Menteş nâm Yahûdî muvâcehesinde ikrâr ve takrîr-i kelâm edip târih-i kitâbdan dört sene mukaddem mezbûr Heron’a iki bin beş yüz akçe ikrâz ve teslîm ol dahi iktirâz ve tesellüm ve kabz eylemiş idi deyü mezbûrdan mukaddemâ da‘vâ ve taleb eylediğimizde mezbûr Heron dahi inkâr etmeğin beynimizde münâza‘ât-ı kesîre vukū‘undan sonra vesâtet-i muslihîn ile da‘vâ-yı mezbûreden benimle mezbûr Heron an-inkârin bin nakd akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezkûr bin akçeyi mesfûr Heron yedinden alıp kabz edip da‘vâ-yı mezbûreden zimmetini ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’s-sânî min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: es-Sâbıkūn.