İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 199 Hüküm no: 154 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesinden Havva Hatun bt. Abdullah’ın mirasının taksimi İbrâ. Mahmiye-i İstanbul’da Kirmasti mahallesinde sâkine iken bundan akdem vefât eden Havva Hatun bt. Abdullah Efendi’nin verâseti anasının anası Kerîme Hatun bt. Abdüsselam ve li-ebeveyn kız karındaşları Fâtıma ve Emine ve Sâliha’ya münhasıra ve tashîh meseleleri on beş sehm i‘tibâr olunup sihâm-ı mezbûrenin üç sehmi mezbûre Kerîme Hatun’a ve dörder sehmi mezbûrâtdan her birine isâbet ve intikāl eylediği şer‘an zâhir ve müte‘ayyin oldukdan sonra mezbûre Kerîme Hatun meclis-i şer‘de tereke-i müteveffât-ı mezbûreye vâzı‘atü’l-yed olan merkūmât Fâtıma ve Emine ve Sâliha taraflarından husûs-ı âti’z-zikri tasdîka ve bedel-i sulhu i‘tâya sâbitü’l-vekâle vekîlleri olan merkūme Fâtıma’nın zevci işbu bâ‘isü’l-kitâb Receb Efendi b. Mehmed mahzarında bi-tav‘ihâ ikrâr ve takrîr-i kelâm edip müteveffât-ı merkūmenin nukūd ve akār ve menkūl ve sâir kalîl ve kesîr ve celîl ve sagīr terekesinden bana isâbet eden üç sehm hisse-i şer‘iyem mukābelesinde şerâ’it-i sıhhat-ı sulhu hâvî ve mevâni‘-i müfsideden ârî tahârüc-i şer‘î tarîki üzere mezbûrât benimle sekiz bin akçe üzerine sulh olup bedel-i sulh-ı mezbûru vekîl-i mezbûr Receb Efendi yedinden tamamen ahz u kabz edip müteveffât-ı mezbûrenin cemî‘ terekesinden merkūmâtın zimmetlerini ibrâ-i âmm ile ibrâ ve ıskāt eyledim. Ba‘de’l-yevm müteveffât-ı merkūme Havva’nın terekesine müte‘allika da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sânî ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Şeyh Karaca Mustafa Efendi b. Mehmed, Ali Beşe b. Osman, Mehmed Çelebi b. Abdurrahman, es-Seyyid Mehmed Çelebi b. es-Seyyid ( ), Hasan Çelebi b. Mehmed, Ahmed b. Yusuf, İbrahim b. Abdi, Mehmed b. Abbas, Şükrullah b. Mustafa.