İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 200 Hüküm no: 155 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’ya ait mülklerin satışı Hâlâ Atebe-i aliyye’de gümrük emîni olan kıdvetü’l-emâcid ve’l-a‘yân makbûlü’s-sudûr ve’l-erkân Ahmed Ağa tarafından husûs-ı âti’l-beyânı ikrâra vekîl olup nehc-i şer‘î ve vech-i mer‘î üzere vekâleti sâbite olan Osman Ağa meclis-i şer‘de hâlâ Rikâb-ı Hümâyûn-ı Sa‘âdet makrûnda Haseki olmağla şerefyâb olan umdetü’l-emâcid ve’l-ekârim zübdetü’l-e‘azım ve’l-efâhim zü’l-kadri’r-refî‘ ve’l-câhi’l-menî‘ el-Hâc İsmail Ağa b. Mustafa taraf-ı izzet-i şereflerinden ikrâr-ı câ’i’z-zikri tasdîka vekîl olup Mustafa Ağa b. Mehmed ve el-Hâc İshak Ağa b. Mustafa şehâdetleri ile vekâleti sâbite olan Ali Çelebi b. Ahmed mahzarında bi’l-vekâle ikrâr ve takrîr-i kelâm edip müvekkil-i müşârün-ileyh Ahmed Ağa’nın mahmiye-i İstanbul’da Bahçekapısı dâhilinde Navduloğlu mahallesinde vâki‘ bir tarafı İmâd Ağa mülküne ve bir tarafı Kılıç Ali Paşa Câmi‘i’ne ve iki tarafı tarîk-i âm ile mahdûd beher sene İstrongile vakfına bin dört yüz akçe mukāta‘ası olup dâhiliye ve hâriciye büyût-ı müte‘addideyi müştemil menzilin binâsı mülkü olmağın hâlâ sâlifü’z-zikr menzilin binâsını târih-i kitâbdan altmış gün tamamına değin <> her kîsesi kırk bin akçeye olmak üzere yirmi kîse akçeye müvekkil-i müşârün-ileyh el-Hâc İsmail Ağa’ya bey‘ bi’l-vefâ ciheti üzere bey‘ ve teslîm onlar dahi minvâl-i muharrer üzere iştirâ ve tesellüm ve kabz ve kabûl eyleyip arsasını dahi vakf-ı mezbûrun mütevellîsi izniyle müvekkil-i müşârün-ileyh vech-i mübeyyen üzere ferâğ ve tefvîz ol dahi kabûl eyledikden sonra semen-i mezbûr yirmi kîse akçeyi bi’t-tamam alıp kabz eyledi. Eğer müddet-i merkūme tamamında zikrolunan yirmi kîse akçeyi müvekkil-i müşârün-ileyhe edâ ve teslîm edemezsem bey‘-ı mezbûr bâtte münkalib olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: el-Hâc İshak Ağa bin Nasuh, Haseki Yusuf Ağa b. ( ), Koçı Mustafa Ağa, Çukadâr Mustafa Ağa, Osman Çelebi b. Veli ve gayruhum.