İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 213 Hüküm no: 162 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’nın Kalyoz mahallesinde vefat eden Fatma Hatun bt. Mahmud Çavuş’un terekesinin taksimi Husûs-ı âti’l-beyânın mahâllinde tahrîri olunmağın savb-ı şer‘den Mevlânâ Mustafa Efendi irsâl olunup ol dahi mahmiye-i İstanbul’da Kirmasti mahallesinde vâki‘ merhûm Mehmed Bahri Efendi’nin menziline varıp zeyl-i rakīmde esâmîleri mastûr Müslimîn huzurunda akd-i meclis-i şer‘-i kavîm eyledikde vilâyet-i Anadolu’da mahrûse-i Bursa’da hisar dâhilinde Kalyoz mahallesinde sâkine iken bundan akdem vefât eden Fâtıma Hatun bt. Mahmud Çavuş’un verâseti sadrî kebîr oğulları Mustafa Efendi ve Derviş Ali Efendi’ye ve sadriye kızı Âişe Hatun’a münhasıra olup kable’l-kısme mezbûr Mustafa Efendi dahi vefât edip verâseti zevce-i metrûkesi fahrü’l-muhadderât Şerife Rahime Hatun bt. el-merhûm Esad Efendi’ye ve sulbiye sagīre kızı Râbia’ya ve li-ebeveyn er karındaşı mezbûr Derviş Ali Efendi’ye ve li-ebeveyn kız karındaşı mezbûre Âişe Hatun’a münhasıra olduğu ve tashîh-i meseleleri bi-tarîkı’l-münâsahati’l-mezkûre yirmi sehimden olup sihâm-ı mezbûreden bir bir sehmi mezbûre Şerife Rahime’ye ve dört sehmi sagīre-i mezbûre Râbia’ya ve on sehmi mezbûr Derviş Ali Efendi’ye ve beş sehmi mezbûre Âişe Hatun’a isâbet eylediği şer‘an zâhir ve mütehakkık oldukdan sonra sagīre-i mezkûrenin kıbel-i şer‘den mansûbe vasîyy-i şer‘îsi ve vâlidesi mezbûre Şerîfe Rahime Hatun tarafından husûs-ı câ’i’z-zikre vekîl olup vekâleti mezbûrenin li-ebeveyn karındaşları umdetü’l-ulemâi’l-izâm es-Seyyid Mehmed Sadi Efendi ve fahrü’l-müderrisîni’l-kirâm Ebussuûd Efendi şehâdetleri ile şer‘an vekâleti sâbite olan ekmelü’l-müderrisîn efdalü’l-muhakkıkīn Habilzâde Ömer Efedi meclis-i mezbûrda işbu kitâbın sahibi mezbûr Derviş Ali Efendi mahzarında bi’l-vekâle ikrâr ve takrîr-i kelâm edip mahrûse-i mezbûre Bursa’da hisar dâhilinde mârrü’z-zikr Kalbuz mahallesinde vâki‘ iki tarafdan Seyyid Hüseyin Erzincânî Vakfı’na ve bir tarafdan ba‘zan Âişe Hatun ve ba‘zan tarîk-i âm ve ba‘zan Kazzâz Hasan Çelebi mülküne ve bir tarafdan Haffâf el-Hâc Mustafa mülküne ve ba‘zan Mahzenci Mustafa mülküne müntehî ve muhavvâta-i dâhiliyesi beş bâb süflî beyti ve iki kebîr sofayı ve iki sagīr sofayı ve üç ulvî beyti ve iki sundurmayı ve bir matbah ve bir kilâr ve bir zîr-i zemîn ve bir fırın ve üç mahâlde mâ-i cârîyi hâvî kanavât-ı memlûkeyi ve bir havuzu ve bir su harkını ve cüneyneyi hâvî ve muhavvâta-i hâriciyesi bir beyt-i süflî ve bir sofa-i süfliye ve iki beyt-i ulvî ve bir ahır ve mâ-i cârîyi hâvî kanavât-ı memlûke ve cüneyneyi müştemil bin kıt‘a esedî guruşa mukavvem ve bi-tarîkı’l-münâsahati’l-mezkûre yirmi sehm i‘tibâr olunan mecmû‘-ı menzil-i mezkûrun dört sehmi sagīre-i mezkûreye ve bir sehmi merkūme Şerife Rahime Hatun’a ve on sehmi mezbûr Derviş Ali Efendi’ye ve beş sehmi mezbûr Âişe Hatun’a intikāl eylemişdi, menzil-i mezbûr harâba müşrif olduğundan mâ‘adâ âhar diyârda olmağla sagīre-i mezkûrenin hissesinin dahi harcına vefâ etmemeğin hissesi bey‘ ve semeni irbâh olunmak her vechile sagīre-i mezbûre hakkında enfa‘ ve ahrâ olmağın ba‘de’l-müzâyede ve inkıtâ‘-ı ragabâti’n-nâs sagīre-i mezbûrenin dört sehm hissesi semen-i misli olan iki yüz esedî guruşa ve müvekkile-i mezbûre Şerife Rahime Hatun’un bir sehm hissesi elli esedî guruşda mezbûr Derviş Ali Efendi üzerinde karâr edip ziyâde ile tâlib-i âhar olmamağın vekâlet-i mahkiyem hasebiyle cemî‘ tevâbi‘ ve levâhıkı ile sagīre-i mezkûrenin hisse-i mezkûresini iki yüz esedî guruşa ve müvekkile-i mezbûrenin hissesini elli esedî guruşa mûmâ-ileyh Derviş Ali Efendi’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi minvâl-i muharrer üzere iştirâ eyledikden sonra semenleri olan iki yüz elli esedî guruşu tamamen mezbûr Derviş Ali Efendi yedinden alıp kabz edip mebî‘-i mezkûru mahâllinde kabz ve tasarrufa müşteri-i mezbûr Derviş Ali Efendi’yi taslît eyledim ba‘de’l-yevm menzil-i mahdûd-ı mezbûrda sagīre-i mezkûre ile müvekkile-i [mer]kūme Şerife Rahime Hatun’un alâka ve medhali kalmadı dedikde gıbbe’t-tasdîkı’ş-şer‘î mevlânâ-yı mezbûr mahâllinde vâki‘ hâli tahrîr ba‘dehû meclis-i şer‘e gelip âlâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-Recebi’l-ferd li-sene isnâ ve seb‘în ve elf. Şuhûdü’l-hâl: Ekmelü’l-müderrisîn Mahmud Efendi b. Ali, Fahrü’l-müderrisîn Tosyavî Mehmed Efendi, Fahrü’l-müderrisîn Hâfız Mustafa Efendi, Fahrü’l-kuzât Ali Efendi b. Mahmud, Hammâmî Ömer Ağa b. Mehmed, Çukadâr Ali Beşe b. Mustafa, Çukadâr Hüseyin Beşe.