İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 215 Hüküm no: 163 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Alahoz Mehmed Efendi’nin Ahmed Paşa’da olan alacağının tahsili ve varisi olan zevcesi Canan bt. Abdullah’a teslimi Sâbıkā defter emîni olup vefât eden Alahoz Mehmed Efendi’nin verâseti zevce-i metrûkesi Canan bt. Abdullah nâm hatun ile li-ebeveyn kız karındaşı Âişe nâm hatuna münhasıra olduğu şer‘an zâhir oldukdan sonra mezbûre Canan Hatun hâlâ dîvân-ı kāimmakām-ı sadrazamîde akd olunan meclis-i şer‘de Ali Hulusi Arslan mahzarında üzerine da‘vâ ve takrîr-i kelâm edip mûrisim ve zevcim müteveffâ-yı mezbûr Mehmed Efendi’nin Seydi Ahmed Paşa zimmetinde karz-ı şer‘îden olan akçesini müşârün-ileyhden kabz ve hisselerimizi bize îsâl ve teslîmde vekîlimiz olan mezbûr Ali Çelebi Draç kal‘asında paşa-yı müşârün-ileyhe varıp meblağ-ı mezbûru [taleb] eyledikde paşa-yı müşârün-ileyh dahi İstanbul’da kapı kethudâsı olan Şaban Ağa yedinde olan mâldan tahte’l-hesâb bin riyâlî guruş al deyü emir ve tevkîl etmekle ol dahi ber-minvâl-i muharrer vekâleten Şaban Ağa’dan bin riyâlî guruş alıp meblağ-ı mezbûrdan mezbûrun harc-ı râhı için ihrâc olunan kırk riyâlî guruşdan mâ‘adâ yedinde bâkī kalan dokuz yüz altmış guruşun rub‘u olan iki yüz kırk riyâlî guruşu mezbûr Ali Çelebi’den taleb ederim suâl olunsun dedikde gıbbe’s-suâl mezbûr Ali cevâbında fi’l-vâki‘ paşa-yı müşârün-ileyh emriyle kapı kethudâsı mezbûr Şaban Ağa yedinde olan mâldan bin riyâlî guruş kabz eyledim lâkin paşa-yı müşârün-ileyh hazretleri meblağ-ı mezbûru bana hîbe etmekle ben dahi ittihâb ve kabz eyledim deyü def‘le mukābele edicek, mezbûr Ali Çelebi’den def‘-i mezbûru için beyyine taleb olundukda ikāme-i beyyineye kādir olmamağla ber-vech-i âtî istihlâf etmeğin mezbûre Canan Hatun paşa-yı müşârün-ileyh meblağ-ı mezbûru mezbûr Ali Çelebi’ye hîbe eylediğin bilmediğine ba‘de’t-tahlîf yemîn billâhi’l-aliyyü’l-azîm etmeğin meblağ-ı mezbûr dokuz yüz altmış riyâlî guruşdan iki yüz kırk riyâlî guruş rub‘ hissesini mezbûre Canan’a teslîme merkūm Ali Çelebi’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Mehmed Ali b. Mahmud Ser-muhzırân, Fahrü’l-akrân Ali b. Oruç, Ahmed Çelebi b. Mahmud Kethudâ-i muhzırân, Abdi Çelebi b. Hüseyin.