İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 215 Hüküm no: 164 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Çavuş mahallesinden Mehmed Ağa b. Osman’ın Laleliçeşme yakınında bulunan dükkânlarını Yeniçeri Ocağı’nda zağracıbaşı olan Hüseyin Ağa’ya satması Dârü’l-hilâfeti’l-aliyye Kostantıniyyeti’l-mahmiye mahallâtından Çoban Çavuş mahallesinde sâkin fahrü’l-a‘yân Mehmed Ağa b. Osman meclis-i şer‘de dergâh-ı âlî yeniçerileri ocağından hâlâ zağracıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim el-Hâc Hüseyin Ağa b. Ali tarafından ikrâr-ı âti’l-beyânı tasdîka vekîl olup nehc-i şer‘î ve vech-i mer‘î üzere vekâleti sâbite olan umdetü’l-emâsil ve’l-akrân Ahmed Çelebi b. el-Hâc Mehmed mahzarında tav‘an ve rağbeten ikrâr u i‘tirâf edip zikri âtî bey‘in sudûruna değin mülk ve hakkım olup mahmiye-i mezbûrede Lâleliçeşme kurbünde vâki‘ iki tarafı ba‘zan Ali Çelebi mülküne ve ba‘zan Mustafa Ağa mülküne ve bir tarafı Mehmed Çelebi dükkânına ve bir tarafı tarîk-i âmma müntehî biri pazarcı ve biri sebzeci ve biri kasab üç dükkânı cemî‘ tevâbi‘ ve levâhıkı ve kâffe-i menâ[fi‘] ve merâfıkı ile tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz otuz iki bin fıddî râyic fi’l-vakt akçeye müvekkil-i mesfûr el-Hâc Hüseyin Ağa’ya bey‘ ve teslîm edip ol dahi vech-i meşrûh üzere iştirâ ve tesellüm ve kabûl ve kabz eyledikden sonra semen-i mesfûr yüz otuz iki bin mârrü’l-vasf akçeyi müvekkil-i mesfûr el-Hâc Hüseyin Ağa yedinden tamamen ahz u kabz edip ba‘de’l-yevm sâlifü’z-zikr üç bâb dükkânda ve semen-i mezkûrda vechen mine’l-vücûh ve sebeben mine’l-esbâb benim için hak ve alâka kalmadı keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Mustafa Efendi el-kâtib, Mehmed Efendi b. Timur Kâtib, Sarrâc Mustafa Çelebi b. Receb, Ahmed Beşe b. Mehmed, kıdvetü’l-ekâbir Nasuh Ağa çavuş-ı miyâne, Zübdetü’l-a‘yân Abdi Ağa b. Kāimmakām Cabir Kethudâ, Abdülbaki Çelebi kethudâ-i ketân sâbıkā, Keresteci Mehmed Çelebi.