İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 219 Hüküm no: 169 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Beşe b. Durmuş’dan alacağını tahsil eden Ayasofya-i Kebir Medresesi’nde sakin Hasan Efendi b. Musa’nın adı geçeni ibra etmesi Mahmiye-i İstanbul’da Ayasofya-i Kebîr Medresesi’nde sâkin Hasan Efendi b. Musa nâm mu‘îd meclis-i şer‘de Dergâh-ı Âlî yeniçerilerinin on üçücü ağa bölüğü oda ahâlîsinden işbu rafi‘u’l-kitâb Receb Beşe b. Durmuş nâm râcil mahzarında ikrâr ve takrîr-i kelâm edip târih-i kitâbdan iki sene mukaddem Usta İsa nâm kimesnenin veresesine îsâl eyle deyü mezbûra kırk şerîfî altın verip ol dahi ba‘de’l-kabz zikrolunan şerîfîyi îsâl etmeyip yedinde kalmışdır deyü mezbûr Receb Beşe’den bundan esbak da‘vâ ve taleb sadedinde olmuş idim. El-hâletü-hâzihî sadedinde olduğum da‘vâ-yı mezkûremden mezbûr Receb Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, min-ba‘d husûs-ı mezkûra müte‘allika benden veyâ vekîlimden da‘vâ ve nizâ‘ sudûr ederse lede’l-hükkâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: Mehmed Beşe Seroda b[ölük] 13, Abdurrahman Beşe b. Lütfullah, Mahmud Beşe b. Ali, Aşçı Ahmed Beşe, Hasan Ağa kethudâ-yı Sefer Paşazâde, Mehmed Çavuş b. Abdullah el-mübâşir, Mehmed Çavuş b[ölük] 31, Mustafa Beşe b. Osman b[ölük] 13, Ahmed Beşe b. Abudllah b[ölük] 13, Ahmed Beşe vekîlharc b[ölük] 13.