İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 220 Hüküm no: 171 Orijinal metin no: [20b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesinden Havva Hatun bt. Abdullah’tan kalan evin satılarak parasının varislerine teslim edilmesi Mahmiye-i İstanbul’da Kirmasti mahallesinde sâkine iken bundan akdem vefât eden Havva Hatun bt. Abdullah’ın verâseti anasının anası Kerîme Hatun ve li-ebeveyn kız karındaşları Fâtıma ve Emine ve Sâliha’ya münhasıra olduğu şer‘an mütehakkık oldukdan sonra mezbûrât Kerîme ve Fâtıma ve Emine ve Sâliha meclis-i şer‘de işbu bâ‘isü’l-kitâb Receb Efendi b. Mehmed mahzarında her biri ikrâr u i‘tirâf edip mezbûr Receb Efendi’yi mukaddemâ mahalle-i mezbûrede vâki‘ ale’l-iştirâki’s-seviy taht-ı tasarrufumuzda olan mülk menzilimizi bey‘ ve kabz-ı semene tarafımızdan vekîl nasb u ta‘yîn edip ol dahi ba‘de kabûlü’l-vekâle menzil-i mezbûru yetmiş iki bin akçeye âhara bey‘ ve semenini vekâleten kabz etmekle hâlâ semen-i mezbûr yetmiş iki bin akçeyi mezbûr Receb Efendi bize teslîm, biz dahi yedinden bi’t-tamam ahz u kabz edip yedinde bir akçe hakkımız bâkī kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sabî‘ aşer min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: es-Sâbıkūn