İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 225 Hüküm no: 177 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatyakapısı yakınlarında mukim Agya v. Avanos’un terekesinin taksimi ve mirasçıları arasındaki anlaşmazlığın giderilmesi Mahmiye-i İstanbul’da Samatyakapısı kurbünde sâkin iken bundan akdem hâlik olan Agya v. Avanos nâm Ermeninin verâseti zevce-i metrûkesi Metin? bt. Avanos’a ve sulbî kebîr oğlu Haçador’a ve sulbiye kebîr kızı Sara’ya münhasıra ve tashîh-i meselesi yirmi dört sehimden olup sihâm-ı mezbûrenin üç sehmi zevce-i mezbûreye ve on dört sehmi oğlu mezbûra ve yedi sehmi kızı mezbûreye isâbet eylediği şer‘an bâhir ve müte‘ayyen oldukdan sonra mezbûre Sara tarafından husûs-ı âtîye vekîl olup Melkon v. Tokil ve Asvador v. Arakir nâm Ermeniler şehâdetleri ile şer‘an vekâleti sâbite olup zevci Hannan v. Bedros nâm Ermeni mesclis-i şer‘de mezbûr Haçador muvâcehesinde üzerine bi’l-vekâle takrîr ve da‘vâ edip hâlik-i mezbûr hayatında mezbûr Haçador mahalle-i mezbûrede vâki‘ sâkine olduğu menzili iştirâ eylediği hînde mezbûr Haçador’a üç yüz kıt‘a riyâlî guruşu ikrâz ve teslîm ol dahi iktirâz ve kabz edip kable’l-ahz hâlik olmağın meblağ-ı mezbûr veresesine isâbet ve intikāl etmekle hâlâ müvekkilem mezbûrenin yedi sehm hissesine â’id olan seksen yedi buçuk guruşu mezbûr Haçador’dan taleb ederim suâl olunsun dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ hâlik-i mezbûr Agya’dan hayatında üç yüz riyâlî guruş iktirâz ve kabz eylediğine mezbûr Haçador’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’s-sâmin min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Şükrullah b. Mustafa, Resül b. Rıdvan, Abdi b. Hüseyin, Mehmed b. Ramazan, Mehmed Efendi b. Osman el-imâm, Nasuh Bey b. Abdullah.