İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 233 Hüküm no: 188 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Kasım mahallesinden Sahak v. Varador’un arsasını kaynanası Arzi bt. Serkiz’e satması Mahmiye-i İstanbul’da Kâtib Kasım mahallesinde mütemekkin Sahak v. Varador nâm Ermeni meclis-i şer‘-i hatîrde kāyın anası işbu hâmiletü’s-sifr Arzi bt. Serkiz nâm Ermeniye mahzarında ikrâr ve takrîr-i kelâm edip akd-i âtî sudûruna dek silk-i mülkümde olup mahalle-i mezbûrede vâki‘ bir tarafdan Yagop v. Doriş nâm Ermeni zimmî mülküne ve bir tarafdan Ketoşer nâm zimmî tasarrufunda olan vakıf menzile ve iki tarafdan tarîk-i âmma müntehî iki yüz on altı zirâ‘ muhterik mülk menzil arsamdan tarîk-i âm tarafında vâki‘ olan altmış zirâ‘ menzil arsasını her zirâ‘ı yüz yetmiş beş akçeden on bir bin sekiz yüz akçeye kāyın anam mezbûre Arzi’ye bâtten bey‘ ve teslîm ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr on bir bin beş yüz akçeyi tamamen mezbûre Arzi yedinden alıp kabz eyledim, min-ba‘d arsa-i mezkûrenin altmış zirâ‘ı mezbûre Arzi’nin mülk-i müşterâsıdır keyfe mâ yeşâ mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Şa‘bâni’l-mu‘azzam li-sene isneyn ve seb‘în ve elf Şuhûdü’l-hâl: es-Sâbıkūn