İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 235 Hüküm no: 191 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya-i Kebir civarında bulunan hanlarda kefili olmayanların konaklamasına izin verilmemesi Dârü’l-hilâfeti’l-aliyye Kostantıniyyeti’l-mahmiyede hâlâ Dergâh-ı Âlî yeniçerileri ağası kāimmakāmı olan iftihârü’l-emâcid ve’l-ekârim câmi‘ü’l-mehâmid ve’l-mekârim bi’l-fi‘il zağracıbaşı olan Hüseyin Ağa -dâme mecduhû- tarafından husûs-ı âti’l-beyâna vekîl olan Mehmed Beşe b. ( ) meclis-i şer‘-i hatîr-i lâzımü’t-tevkīrde mahmiye-i mahkiyede Ayasofya-i Kebîr kurbünde vâki‘ Küçük Ayasofya Vakfı’ndan olan hânın müste’ciri olan Ramazan [b.] Muharrem mahzarında takrîr-i kelâm edip mahmiye-i mezbûrede vâki‘ hânlarda bazı ehl-i fesâd ve esirci tâifesi sâkin olup nice kimesnelerin gulâm ve cevârîsini ayardıp âhara bey‘ etmeleri ile taraf-ı saltanat-ı aliyyeden me’mûren her birine? tenbîh olunmuşdur mezbûr Ramazan’ın hânında nice fesâd olduğu istimâ‘ olunmağla hânda nüzûl edenlerden kefîl almadıkça iskân etmemek üzere taraf-ı şer‘den dahi tenbîh olunsun dedikde mezbûr Ramazan ba‘de’l-yevm hân-ı mezbûra nüzûl edenlerden kefîl alıp olmayan kimesneyi iskân etmemek üzere tenbîh ve mezbûr Ramazan dahi ba‘de’l-yevm nüzûl edenlerin kefîllerin almak üzere ta‘ahhüd etmeğin v[âkı‘ü]’l-hâl bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Mehmed b. el-Hâc Mahmud Ser-muhzırân, Hasan Beşe b. ( ) Çukadar, Ali Ağa b. Oruç, el-Hâc Ahmed Çelebi b. Mahmud, kethudâ-i muhzırân, Ali b. Mehmed, Şükrullah b. Mustafa.