İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 235 Hüküm no: 192 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Gıyaseddin mahallesinden Mehmed Çelebi b. Hüseyin’in Mustafa Beşe b. Murad’dan alacağı olduğuna dair iddiasını ispat edememesi Mahmiye-i İstanbul’da Hoca Gıyaseddin mahallesinde sâkin Mehmed Çelebi b. Hüseyin nâm kimesne mahfil-i kazâda işbu sahibü’l-kitâb Mustafa Beşe b. Murad mahzarında üzerine da‘vâ ve takrîr-i kelâm edip târih-i kitâbdan iki sene mukaddem merkūm Mustafa Beşe cezîre-i Sakız muhâfazasında olan Ahmed Çorbacı nâm kimesnede olan bir kıt‘a emr-i şerîf ile bir kıt‘a hüccet-i şer‘iyemi adam gönderip getir deyü her ne kadar harcın giderse sana vereyim deyü bana emredip biz dahi emrine binâen bir sâîye on beş riyâlî guruş verip zikrolunan emr-i şerîf ve hüccet-i şer‘iyeyi mezbûr Ahmed Çorbacı’dan getirdip mezbûr Mustafa Beşe’ye teslîm eylemişdim, hâlâ meblağ-ı medfû‘-ı mezbûru bana vermeden imtinâ‘ eder, taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden ızhâr-ı acz edip istihlâf etmeğin mezbûr Mustafa Beşe ber-minvâl-i muharrer Ahmed çorbacıdan zikrolunan emr-i şerîf ile hüccet-i şer‘iyeyi getir, her ne kadar harcın giderse sana vereyim deyü müdde‘î-i mezbûra emreylediğine yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin müdde‘î-i mezbûr mu‘ârazadan men‘ birle mâ-vaka‘a bi’t-taleb ketb olundu. Fi’l-âşir min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Halil Beşe b. İbrahim mübâşir, Mehmed Efendi b. Abdülbaki, Ahmed Efendi b. Muharrem, Abdi Çelebi b. Hüseyin.