İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 236 Hüküm no: 193 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Efendi mahallesinden Emine bt. Abdullah ile Mehmed b. İdris arasındaki alacak davasının anlaşmayla sonuçlanması Mahmiye-i İstanbul’da Sunullah Efendi mahallesinde sâkine Emine bt. Abdullah nâm hatun mahfil-i kazâda işbu bâ‘isü’l-kitâb Mehmed b. İdris mahzarında ikrâr ve takrîr-i kelâm edip mezbûr Mehmed zimmetinde karz-ı şer‘îden üç bin akçe hakkım olup meblağ-ı mezbûrdan bin yedi yüz elli akçesini yedinden ahz u kabz edip zimmetinde bin üç yüz akçe hakkım bâkī kalmışdır, hâlâ merkūm Mehmed’den da‘vâ ve taleb eylediğimde ol dahi cevâbında meblağ-ı mezbûru alâ-tarîkı’l-mudârebe ahz u kabz edip bilâ-ta‘ad helâk oldu deyü cevâb ile mukābele etmekle beynimizde münâza‘ât-ı kesîre vâkı‘a olmuşdu, el-hâletü hâzihî vesâtet-i muslihîn ile da‘vâ-yı mezbûreden merkūm Mehmed benimle beş yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr beş yüz akçeyi merkūm Mehmed yedinden tamamen ahz u kabz edip mâ‘adâsı da‘vâsından mezbûr Mehmed’in zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Şükrullah b. Mustafa, Abdi Çelebi b. Hüseyin, Hüseyin b. Ebîbekir, Mehmed b. Ramazan, Resül b. Rıdvan, Ali Beşe b. İsmail, Mehmed Beşe b. İsmail.