İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 237 Hüküm no: 194 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapı’da meyhanecilik yapan Manol v. Yorgi’nin Kartina nahiyesi Korkokaşile köyündeki Mihrimah Sultan Vakfı’na reaya olarak kayıtlı olduğundan kendisinden vergi istenmemesi Mahmiye-i İstanbul’da Kumkapı hâricinde meyhâneci tâifesinden olan işbu bâ‘isü’s-sifr Manol v. Yorgi nâm zimmî mahfil-i kazâda vilâyet-i Rumeli’nde Kartina nâhiyesinde Korkokaşile? nâm karye ahâlîsinden Nikola v. Yani ve Panayot v. Lisar ve Nikola v. Yorgi nâm zimmîler muvâcehesinde takrîr-i kelâm edip işbu yedimde olan emr-i şerîf mûcebince ben medîne-i Üsküdar’da vâki‘ merhûme Mihrimah Sultan Evkāfı re‘âyâsı kaydolunup bu ana değin harâc ve sâir tekâlîfimi taraf-ı vakfına edâ ederken zimmiyûn-ı mezbûrûn seni bizim karyemiz ahâlîsinden olmağla bizimle ma‘an harâcını ver deyü beni rencîdeden hâlî değildir hâlâ suâl olunup merkūmûn bana ta‘arruzdan men‘ olunmak murâdımdır dedikde gıbbe’s-suâl merkūmûn cevâblarında fi’l-vâki‘ merkūm Manol mukaddemâ bizim karyemiz ahâlîsinden olup ba‘dehû yedinde olan emr-i şerîf mûcebince evkāf-ı mezbûre re‘âyâsı kaydolunmağla bu ana değin bizimle ma‘an harâc ve sâir tekâlîfi veregelmiş değildir deyü bi-tav‘ihim ikrâr etdiklerinde ikrârları mûcebince merkūmûn zimmîler bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’s-sâmin aşer min-Şa‘bâni’l-mu‘azzam sene [10]72 Şuhûdü’l-hâl: es-Sâbıkūn