İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 237 Hüküm no: 195 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb kasabası Dere mahallesinde İsmail b. Bayram’ın Marat v. Hudaverdi’nin evini basması Vilâyet-i Anadolu’da Ürgüb kasabasında Dere mahallesinden olup kendi tarafından asîl ve zevcesi Nergis nâm Nasrâniye tarafından husûs-ı âtîye vekîl-i müsecceli olan Marat v. Hudâverdi meclis-i şer‘de Maktûl Hasan Paşa’nın kahvecisi Mustafa Câbî’nin kahvecisi olup mahalle-i mezbûre sükkânından İsmail b. el-Hâc Bayram mahzarında üzerine takrîr-i da‘vâ edip mezbûr İsmail târih-i kitâbdan dokuz ay mukaddem mahalle-i mezbûrede vâki‘ menzilimi basıp zevcim mezbûre Nergis’in saçını kesmişdir, mezbûrdan suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyin beyyine taleb olundukda mahalle-i mezbûre sükkânından Seyyid Ahmed Efendi b. Seyyid Davud ve Mehmed b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ mezbûr İsmail târih-i kitâbdan dokuz ay mukaddem bizim huzûrumuzda mezbûr Marat’ın menzilini basıp zevcesi mezbûre Nergis’in saçını kesdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra kasaba-i mezbûrda Aşağı mahallesinden Oruç b. Hızır ve İbrahim b. Mustafa ve Ramazan b. Ali ve Sefer b. Abdullah nâm kimesneler mezbûr İsmail’in sâ‘î bi’l-fesâd olduğunu her biri haber verdiklerinde mâ hüve’l-vâki‘ bi’t-taleb ketb olundu. Fi’l-hâmis aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: el-Hâc Mustafa, el-Hâc Ahmed b. Mehmed, Şükrullah b. Mustafa, Resül b. Rıdvan, Abdi b. Hüseyin, Mehmed b. Ramazan.