İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 238 Hüküm no: 196 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapı’da meyhanecilik yapan Manol v. Yorgi’nin Kartina nahiyesi Korkokaşile köyündeki Mihrimah Sultan Vakfı’na reaya olarak kayıtlı olduğundan kendisinden vergi istenmemesi Mahmiye-i İstanbul’da Kumkapısı hâricinde olup meyhâneci tâifesinden olan işbu bâ‘isü’s-sifr Manol v. Yorgi nâm zimmî mahfil-i kazâda vilâyet-i Rumeli’nde Kartina nâhiyesinde Korkokaşile? nâm karye ahâlîsinden Nikola v. Yani ve Panayot v. Lisar ve Nikola v. Yorgi nâm zimmîler muvâcehelerinde takrîr-i kelâm edip işbu yedimde olan emr-i şerîf mûcebince ben medîne-i Üsküdar’da vâki‘ merhûme Mihrimah Sultan Evkāfı re‘âyâsı kaydolunup bu ana değin harâc ve sâir tekâlîfi taraf-ı vakfa edâ ederken zimiyyûn-ı merkūmûn sen bizim karyemiz ahalisinden olmağla bizimle ma‘an harâcını ver deyü beni rencîdeden hâlî değillerdir hâlâ suâl olunup merkūmûn bana ta‘arruzdan men‘ olunmak murâdımdır dedikde gıbbe’s-suâl merkūmûn cevâblarında fi’l-vâki‘ merkūm Manol mukaddemâ bizim karyemiz ahâlîsinden olup ba‘dehû yedinde olan emr-i şerîf mûcebince evkāf-ı mezbûre re‘âyâsı kaydolmağla bu ana değin bizimle ma‘an harâc ve sâir tekâlîfi veregelmiş değildir deyü bi-tav‘ihim ikrâr etdiklerinde ikrârları mûcebince merkūmûn Nikola ve Panayot ve diğer Nikola bî-vech ta‘arruzdan men‘ olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah b. Mustafa, Mehmed b. Ramazan, Mustafa b. İsa.