İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 238 Hüküm no: 197 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli vilayeti Yenişehir kazasında vefat eden Karabaş mahallesinden Ahmed Efendi b. Zeynelabidin’in mirasçılarının hisselerini teslim alması Mahmiye-i İstanbul’da Yenibahçe kurbünde Karabaş mahallesi sükkânından olup bundan akdem vilâyet-i Rumeli’nde Yenişehir kazâsında vefât eden Ahmed Efendi b. Zeynelabidin’in verâseti zevce-i metrûkesi Rahime bt. Abdullah ve vâlidesi Âlime bt. İbrahim nâm hatunlar ile li-ebeveyn er karındaşı Yusuf Çelebi’ye münhasıra olup asıl meseleleri on iki sehimden olup sihâm-ı merkūmeden üç sehmi zevcesi merkūme Rahime’ye ve dört sehmi vâlidesi mezbûre Âlime’ye ve beş sehmi karındaşı mezbûr Yusuf Çelebi’ye isâbet ve intikāl eylediği şer‘an zâhir ve müte‘ayyen oldukdan sonra mezbûretân Rahime ve Âlime meclis-i şer‘de müteveffâ-yı mezbûrun metrûkâtına vâzı‘u’l-yed olan mezbûr Yusuf Çelebi mahzarında her biri ikrâr ve takrîr-i kelâm edip müteveffâ-yı mezbûrun düyûn-ı müsbetesi ashâbına edâ ve îfâ olundukdan sonra bâkī mezbûr Yusuf Çelebi yedinde on iki bin akçe kalmış idi, hâlâ meblağ-ı mezbûrdan ikimizin hissesine isâbet eden sehmi hissemiz mukābelesinde yedi bin akçeyi mezbûr Yusuf Çelebi yedinden tamamen ahz u kabz eyledik, ba‘de’l-yevm müteveffâ-yı merkūmun terekesine müte‘allika da‘vâdan mezbûr Yusuf Çelebi’nin zimmetini ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Hasan Efendi b. Mustafa, Abdullah Çelebi b. Ramazan el-müezzin, Ali Çelebi b. Abdullah, Receb Çelebi b. Veli, Ali Bey el-cündî, Ali Bey b. Hasan el-mübâşir, Ahmed Çelebi b. Ali, Abdülbaki Çelebi b. Ahmed.