İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 240 Hüküm no: 199 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Bâyezid mahallesinden Hacı Mehmed Ağa b. Bayram ile Yanaki v. Dimo arasındaki alacak davası çözülerek tarafların birbirini ibra etmesi Husûs-ı âti’l-beyânın mahâllinde tahrîri iltimâs olunmağın savb-ı şer‘den bâ-fermân-ı âlî irsâl olunan Mevlânâ Mustafa Efendi mahrûse-i Galata a‘mâlinden kasaba-i Tophâne’de Sultan Bâyezid mahallesinde Kılıç Ali Paşa Câmi‘i kurbünde fahrü’l-a‘yân el-Hâc Mehmed Ağa b. Bayram’ın sâkin olduğu menzile varıp zeyl-i vesîkada isimleri mastûr olan Müslimîn huzûrlarında akd-i meclis-i şer‘ eyledikde mahrûse-i mezbûreye tâbi‘ kasaba-i Beşiktaş’da Sinan Paşa mahallesinde sâkin Yanaki v. Dimo nâm zimmî meclis-i ma‘kūd-ı mezbûrda râfi‘ü hâze’l-kitâb mezbûr el-Hâc Mehmed Ağa’ya cihet-i deyn-i şer‘îden hâlâ zimmetinde vâcibü’l-edâ ve lâzımü’l-kazâ deynim olan üç bin dört yüz kıt‘a riyâlî guruş mukābelesinde yedinde rehin olup zikrolunan Sinan Paşa mahallesinde vâki‘ ma‘lûmü’l-hudûd menzilin mezbûr el-Hâc Mehmed Ağa kabz eylediği ücretinden gayrı mezkûr el-Hâc Mehmed Ağa benden esmân-ı ma‘lûme-i makbûzaya iştirâ ve kabz eylediği hâl-i küfründe ismi Yuvan olup şeref-i İslam ile müşerref oldukdan sonra ismi Mehmed olan gulâma ve biri sırt ve biri paça iki samur kürke ve bir kapaklı kazgana ve mukaddemâ mezbûr el-Hâc Mehmed Ağa’nın peksimetçi fırınında müste’cir iken bir buçuk sene süknâ ile istifâ-i menfa‘at etmedim, battal fırın için benden yetmiş bir bin akçe ücret kabz etmişdin deyü yetmiş akçe ücret da‘vâsına ve târih-i kitâba gelince mezbûr el-Hâc Mehmed Ağa ile beynimizde cereyân eden ahz ü i‘tâya ve bey‘ ve şirâ ve karz ve ücret ve vedî‘a ve şirket ve nice mu‘âmelât-ı şettâ ve sâir hukūk-ı ma‘lûme ve mechûleye müte‘allika olan cemî‘ de‘âvî ve mutâlebât ve eymân ve muhâsamâtdan mezbûr el-Hâc Mehmed Ağa’yı ibrâ-i âm ile ibrâ ve ıskāt eyledim dedikde mezbûr el-Hâc Mehmed Ağa ben dahi mezbûr Yanaki’nin bana deyni olup bâlâda zikri mürûr eden meblağ-ı mezbûr üç bin dört yüz riyâlî guruş ve iki top altmış guruş ve yedinde rehin olan menzilin meremmâtına harc u sarf eylediğim meblağdan gayrı târih-i kitâba gelince mezbûr Yanaki ile beynimizde cereyân eden ahz u i‘tâ ve bey‘ u şirâ ve karz ve ücret ve vedî‘a ve şirket ve mu‘âmelât-ı şettâ ve sâir hukūk-ı ma‘lûme ve mechûleye müte‘allika olan cemî‘ de‘âvî ve mutâlebât ve eymân ve muhâsamâtdan mezbûr Yanaki’yi ben dahi ibrâ-i âm ile ibrâ ve ıskāt [eyledim] dedikde gıbbe’t-tasâdiki’ş-şer‘î vâki‘ hâli mevlânâ-yı mezbûr mahâllinde ba‘de’t-tahrîr ma‘an ba‘s olunan Osman ve Ali Beşe ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Şahin Ali Ağa el-mübâşir, Zübdetü’l-erkân Abdülbaki Çelebi, el-Hâc İskender b. Hasan, Ali Beşe b. Osman, Yusuf b. Abdullah, Mustafa b. Veli.