İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 244 Hüküm no: 205 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Mehmed Beşe b. Abdülmennan isimli mühtedinin annesi Delot bt. Mihran tarafından alacaklarını tahsil ve kardeşi Karabet v. Toros tarafından öldüğünde techiz tekfin ve diğer işlerini görmek için vekil tayin edilmesi Husûs-ı âti’l-beyânın mahâllinde tahrîri için gıbbe iltimâs kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Seferikoz mahallesinde Delot bt. Mihran nâm Ermeniyenin sâkine olduğu menziline varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde merkūme Delot meclis-i ma‘kūd-ı mezbûrda sadrî oğlu işbu bâ‘isü’l-kitâb Mehmed Beşe b. Abdülmennan nâm mühtedî mahzarında takrîr-i kelâm edip medîne-i Galata’da Karaköy Kapısı dâhilinde sâkin Karayani ve şerîkleri Karakaş diğer Karayani zimmetlerinde cihet-i karz-ı şer‘îden hakkım olan altı yüz riyâlî guruşumu ve habbâz tâifesinden Kulaksız Banaz nâm Ermeni zimmetinde hakkım olan altı yüz riyâlî guruşumu ve habbâz Arzuman zimmetinde hakkım olan yüz riyâlî guruşumu ve mahmiye-i İstanbul’da Mustafa Paşa çarşısında habbâz olan diğer Arzuman zimmetinde hakkım olan yüz riyâlî guruşumu ve mahmiye-i mezbûrede Vâlidehânı’nda sâkin Agop nâm zimmî zimmetinde hakkım olan bin iki yüz riyâlî guruşumu merkūmûndan da‘vâ ve taleb ve ahz u kabza ve bana îsâle ve ahz u îsâl mütevakkıf olduğu umûrun cümlesinde tarafımdan oğlum mezbûr Mehmed Beşe’yi vekîl ve menâbıma nâib nasb u ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd eyledikden sonra merkūme Devlet’in diğer sadrî oğlu Karabet v. Toros nâm Ermeni meclis-i ma‘kūd-ı mezbûrda li-ebeveyn karındaşı mezbûr Mehmed Beşe mahzarında takrîr-i kelâm edip bi-emrillâhi te‘âlâ hâlik olduğumda mâlımdan kadr-ı ma‘rûf techîz ve tekfîn ve sâir levâzım-ı defnime ve sâir beynimizde mu‘tâd olan mesârif-i mühimmeye harc u sarfa merkūm Mehmed Beşe’yi vasîyy-i muhtâr nasb u ta‘yîn eyledim dedikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd eylediğini mevlânâ-yı mezbûr mahâllinde tahrîr ve ba‘dehû ma‘an irsâl olunan Abdi Çelebi b. Hüseyin ile meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Mehmed Efendi b. Mustafa el-imâm, Ahmed Efendi b. el-Hâc Mehmed el-imâm, Kadri Beşe b. Abdülvehhab, Murad Beşe b. Mustafa, Şaban Beşe b. Kasım, el-Hâc Mehmed b. Süleyman Dağıstanî, el-Hâc Mehmed b. el-Hâc Eyyüb, Sakazâde Mehmed Çelebi, Ahmed Çelebi b. Sultan el-Bevvâb-ı Sultanî, Mehmed Çelebi el-kayyûm [ve] gayruhum.