İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 245 Hüküm no: 206 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âbid Çelebi mahallesinden Ayşe bt. Yusuf’un Mehmed Çelebi b. Ahmed’den boşanması Mahmiye-i İstanbul’da Âbid Çelebi mahallesinde sâkine Âişe bt. Yusuf nâm hatunun babası ve tarafından husûs-ı âti’z-zikre vekîli olup mezbûrenin zâtını ma‘rifet-i şer‘iye ile ârifân mahmiye-i mezbûre mahallâtından el-Hâc Ferhad mahallesi sükkânından Yakub Beşe b. Pîrî ve Yusuf Beşe b. Haydar nâm kimesneler şehâdetleri ile şer‘an vekâleti sâbite olan mezbûr Yusuf mahfil-i kazâda müvekkile-i mezbûrenin zevci işbu bâ‘isü’l-kitâb Mehmed Çelebi b. Ahmed mahzarında bi’l-vekâle ikrâr ve takrîr-i kelâm edip müvekkilem mezbûre zevci mersûm Mehmed Çelebi zimmetinde mütekarrer ve ma‘kūdün-aleyh olan üç bin akçe mehr-i mü’ecceli ve nafaka-i iddet-i ma‘lûmesi ve me’ûnet-i süknâsı üzerlerine mersûm Mehmed Çelebi ile muhâla‘a-i sahîha-i şer‘iye ile muhâla‘a eyledikde ol dahi ber-minvâl-i muharrer hul‘-ı mezbûru kabûl edip zevciyete ve gayra müte‘allika âmme-i da‘vâdan her biri âharı ibrâ-i âm ile ibrâ ve ıskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sâbi‘ aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Sâdık Efendi Rodosî, İsmail Çelebi b. Mehmed el-müezzin, Yusuf Bey b. Abdullah, Süleyman Beşe b. Abdullah, Hasan b. Abdullah, Yakub Beşe b. Pîrî, Yusuf Beşe b. Haydar, Şükrullah b. Mustafa.