İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 246 Hüküm no: 207 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Kasım mahallesinden Saltana bt. Serkiz’in arsasını İvaz v. Karabet’e satması Mahmiye-i İstanbul’da Kâtib Kasım mahallesinde sâkine Saltana bt. Serkiz nâm Ermeniye tarafından husûs-ı âti’l-beyânı ikrâra vekîl olup Haçador Papas v. Sarka ve Avanos Papas v. Yani şehâdetleri ile şer‘an vekâleti sâbite olan Kirkor v. Bogos nâm Ermeni meclis-i şer‘de işbu bâ‘isü’s-sifr İvaz v. Karabet nâm Ermeni muvâcehesinde bi’l-vekâle ikrâr ve takrîr-i kelâm edip müvekkilem mezbûrenin silk-i mülk-i sahîhinde münselik olup mahalle-i mezbûrede vâki‘ bir tarafdan Hotar veresesi mülküne ve bir tarafdan Kirakoz v. Serkiz mülküne ve iki tarafdan tarîk-i âmma müntehî bi’r-i mâ’î hâvî tûlen ve arzan bi-hesâb-ı şatrancî yüz kırk zirâ‘ mülk muhterik menzil arsasını yirmi üç bin dört yüz akçeye mezbûr İvaz’a tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi minvâl-i muharrer üzere iştirâ ve kabûl eyledikden sonra semeni olan meblağ-ı mezbûr yirmi üç bin dört yüz akçeyi müvekkilem mezbûre Saltana müşteri-i mezbûr İvaz yedinden tamamen ahz u kabz eyledim, ba‘de’l-yevm arsa-i hâliye merkūm İvaz’ın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Mehmed Efendi b. Hasan El-İmâm, İbrahim Çelebi b. Mustafa El-müezzin, Ali Çelebi b. Mehmed El-müezzin, İsa b. Mehmed el-kayyum, Şükrullah b. Mustafa, Abdi Çelebi b. Hüseyin, Veli b. Mahmud. Haçador v. Sarka, Papa Avanos v. Yani, Bedros v. Toros ve Toros v. Remet? Papas.