İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 247 Hüküm no: 208 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Üveys mahallesinden Salih Ağa b. Ali’nin evinin vekili vasıtasıyla Mehmed Ağa’ya satılması Mahmiye-i İstanbul’da Hoca Üveys mahallesinde sâkin Salih Ağa b. Ali tarafından zikri âtî menzili bey‘ ve kabz-ı semeni ve düyûnunu edâ ve îfâ ve fazlasını kendüye îsâle azl ve in‘izâlden masûne vekâlet-i devriye ile vekîl olup vekâleti hasm-ı câhid-i âtî muvâcehesinde Receb Yazıcı b. Mehmed ve İbrahim b. Mustafa şehâdetleri ile şer‘an vekâleti sâbite olan umdetü erbâbü’t-tahrîr ve’l-kalem zübdetü ashâbi’t-takrîr ve’r-rakām Murtaza Efendi b. Mehmed meclis-i şer‘-i hatîrde Dergâh-ı Âlî yeniçerilerinin Onbirinci Bölüğü’ne mahsûs odanın çorbacısı olan umdetü’l-a‘yân zübdetü’l-erkân Mehmed Ağa b. Ali tarafından ikrâr-ı âtîyi tasdîka vekîl olup nehc-i şer‘î ve vech-i mer‘î üzere vekâleti sâbite olan fahrü’l-eşbâh Mehmed Odabaşı b. Mustafa mahzarında bi’t-tevliye ikrâr u i‘tirâf edip akd-i âtî sudûruna değin müvekkil-i mezbûr Salih Ağa’nın mülk ve hakkı olup mahalle-i mezbûrede vâki‘ bir tarafı Ömer Subaşı mülküne ve bir tarafı Peştemalcı el-Hâc Ali mülküne ve bir tarafı ba‘zan Hadîce Hatun ve ba‘zan Şaban Ağa Vakfı’na ve bir tarafı tarîk-i âmma müntehî buyûtu hâvî mülk menzili cemî‘ tevâbi‘ ve levâhıkı ve kâffe-i hukūk ve hudûd ve merâfıkı ile müvekkil-i mezbûr Mehmed Ağa’ya tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz doksan bin fıddî râyic fi’l-vakt akçeye vekâlet-i mahkiyem hasebiyle bey‘ ve teslîm ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr yüz doksan bin akçeyi tamamen mezbûr Mehmed Ağa yedinden ahz u kabz edip ba‘de’l-yevm menzil-i mahdûd-ı mezkûr mesfûr Mehmed Ağa’nın mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Derviş Efendi b. Abdullah, Osman b. Ömer, Yusuf Beşe b. Abdullah, İbrahim Beşe b. Mustafa, Ömer Beşe b. Abdullah, Ahmed Beşe b. Mehmed.