İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 247 Hüküm no: 209 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Kudüs Kadısı Mustafa Efendi b. Abdullah Çavuş’un varislerinin kendi araarında hisselerini devir ve takas etmeleri Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Kirmasti mahallesinde vâki‘ merhûm Ali Efendizâde Mehmed Bahri Efendi’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde sâbıkā Kuds-i Şerîf kādısı olup bundan akdem vefât eden merhûm Mustafa Efendi b. Abdullah Çavuş’un verâseti zevce-i metrûkesi fahrü’l-muhadderât Şerife Rahime Hatun bt. el-merhûm el-mağfûr ed-dâric ilâ medârici rahmeti rabbihi’l-gafûr Esad Efendi’ye ve sagīre kızı Râbia’ya ve li-ebeveyn er karındaşı Derviş Ali Efendi’ye ve li-ebeveyn kız karındaşı Âişe Hatun’a münhasıra olduğu ve tashîh-i meselesi sekiz sehimden olup sihâm-ı mezbûreden bir sehmi mezbûre Şerife Rahime Hatun’a ve dört sehmi sagīre-i mezbûreye ve iki sehmi mezbûr Derviş Ali Efendi’ye ve bir sehmi mezbûre Âişe Hatun’a isâbet eylediği şer‘an zâhir ve mütehakkık oldukdan sonra mezbûr Derviş Ali Efendi meclis-i ma‘kūd-ı mezbûrda işbu kitâbın hâfizası Şerife Rahime Hatun tarafından ikrâr-ı âti’z-zikri tasdîka vekîl olup vekâleti li-ebeveyn karındaşları umdetü’l-ulemâi’l-izâm zübdetü’l-mevâli’l-kirâm es-Seyyid Mehmed Said Efendi ve zahru’l-müderrisîni’l-kirâm fahrü’l-müdakkıkīni’l-fihâm es-Seyyid Ebussuûd Efendi şehâdetleriyle şer‘an sâbit olan ekmelü’l-müderrisîni’l-kirâm efdalü’l-muhakkıkīni’l-fihâm Habilzâde Ömer Efendi mahzarında ikrâr ve takrîr-i kelâm edip karındaşım ve mûrisim merhûm Mustafa Efendi’nin tereke-i menkūlesi bundan esbak altın iki yüz kırk ve esedî guruş yüz on akçeye râyic iken yedimizde olan defter-i kassâm mûcebince iktisâm eylediğimizde tashîh-i mezkûr üzere iki sehm hisse-i şer‘iyeme isâbet eden yüz yirmi altı bin akçeyi tamamen alıp kabz etmişdim, hâlâ tereke-i akārâtından olup mahrûse-i Bursa’da dâhil-i hısnda vâki‘ menzilde olan sagīre-i mezkûrenin münâsibince ve taksîm cihetlerinden hisse-i şâyi‘asını iki yüz otuz buçuk esedî guruşa ve müvekkile-i mezbûre Şerife Rahime Hatun’un dahi kezâlik menzil-i mezbûrda hisse-i şâyi‘asını elli yedi buçuk esedî guruşa vekîl-i mezbûr Ömer Efendi’den iştirâ edip cem‘an semenleri olan iki yüz seksen sekiz kıt‘a esedî guruşu müvekkile-i mezbûre Şerife Rahime Hatun’a bundan akdem dört yüz otuz yedi esedî guruş ve bir sülüs guruşa bey‘ ve teslîm eylediğim İstanbul’da Baba Ali mahallesinde vâki‘ muhterik menzil arsasında olan hisse-i şâyi‘am ile Bursa kazâsı muzâfâtından Çeltik nâm karyede mülk çiftlik ta‘bîr olunur ma‘lûmü’l-hudûd buyût-ı adîdeyi hâvî menzil ve bağ ve bahçede olan iki sehm hisse-i şâyi‘amın semeni olan meblağ-ı mezbûr dört yüz otuz yedi esedî guruş ve bir sülüs guruşdan iki yüz seksen sekiz esedî guruşuna takās ol dahi mukāssa ve kabûl edip bâkīsi olan yüz kırk dokuz esedî guruş ve bir sülüs guruşu vekîl-i mezbûr Ömer Efendi yedinden tamamen alıp kabz eyledim, min-ba‘d defter-i kassâm mûcebince mûrisim müteveffâ-yı mezbûrun akār ve menkūl terekesinde hak ve alâkam kalmadı dedikde gıbbe’t-tasdîkı’ş-şer‘î mevlânâ-yı mezkûr vâki‘ hâli mahâllinde tahrîr ba‘dehû meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Ekmelü’l-müderrisîn Mahmud Efendi b. Ali, Efdalü’l-müderrisîn Tosyavî Mehmed Efendi, Fahrü’l-müderrisîn Hâfız Mustafa Efendi, Fahrü’l-kuzât Ali Efendi b. Mahmud, Ömer Ağa b. Mehmed el-hammamî, Hasan Beşe Çukadar, Ali Beşe b. Mustafa.