İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 249 Hüküm no: 210 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. Mahmud Çavuş’un ve oğlu Mustafa Efendi’den kalan Bursa’daki evin mirasçılar arasında taksimi Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Kirmasti mahallesinde vâki‘ merhûm Mehmed Bahri Efendi’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde vilâyet-i Anadolu’da mahrûse-i Bursa’da hisar dâhilinde vâki‘ menzil-i câ’i’z-zikrin sülüs-i şâyi‘i şirâen Fâtıma Hatun bt. Mahmud Çavuş’un ve sülüs-i şâyi‘-i âharı sadrî oğlu Mustafa Efendi’nin ve sülüs-i şâyi‘-i âharı dahi âhar oğlu Derviş Ali Efendi’nin mülkleri olup iştirâk-i seviy vechi üzere mutasarrıflar iken bundan akdem merkūme Fâtıma Hatun vefât edip verâseti sadrî kebîr oğulları mezbûrân Mustafa ve Derviş Ali Efendi’ye ve sadriye kızı Âişe Hatun’a münhasıra olup kable’l-kısme mezbûr Mustafa Efendi dahi vefât edip verâseti zevce-i metrûkesi fahrü’l-muhadderât Şerife Rahime Hatun bt. el-merhûm Esad Efendi’ye ve sulbiye sagīre kızı Râbia’ya ve li-ebeveyn er karındaşı mezbûr Derviş Ali Efendi’ye ve li-ebeveyn kız karındaşı merkūme Âişe Hatun’a münhasıra olduğu ve tashîh-i meseleleri bi-tarîkı’l-münâsahati’l-mezkûre yirmi sehimden olup sihâm-ı mezbûreden bir sehmi mezbûr Şerife Rahime’ye ve dört sehmi sagīre-i mezkûre Râbia’ya ve on sehmi mezbûr Derviş Ali Efendi’ye ve beş sehmi merkūme Âişe’ye isâbet eylediği şer‘an zâhir ve mütehakkık oldukdan sonra sagīre-i mezkûrenin kıbel-i şer‘den mansûbe vasîyy-i şer‘iyesi ve vâlidesi mezbûre Rahime Hatun tarafından husûs-ı câ’i’z-zikre vekîl olup vekâleti mezbûrenin li-ebeveyn karındaşları umdetü’l-ulemâi’l-izâm zübdetü’l-mevâli’l-fihâm es-Seyyid Mehmed Said Efendi ve fahrü’l-müderrisîni’l-kirâm zahru’l-müdekkıkīni’l-fihâm es-Seyyid Ebussuûd Efendi şehâdetleri ile şer‘an sâbite olan ekmelü’l-müderrisîn Habilzâde Ömer Efendi meclisi-i mezbûrda işbu râfi‘u’l-kitâb mezbûr Derviş Ali Efendi mahzarında bi’l-vekâle ikrâr ve takrîr-i kelâm edip mahrûse-i mezbûre Bursa’da hisar dâhilinde Kalyoz mahallesinde vâki‘ iki tarafından Seyyid Hüseyin Erzincânî Vakfı’na ve bir tarafdan ba‘zan Âişe Hatun ve ba‘zan tarîk-i âm ve ba‘zan Kazzâz Hasan Çelebi mülküne ve bir tarafdan Haffâf el-Hâc Mustafa ve ba‘zan Mucurcu Mustafa mülklerine müntehî dâhiliyesi beş süflî beyti ve iki kebîr sofa ve iki sagīr sofayı ve üç ulvî beyti ve iki sundurmayı ve bir matbah ve bir kilâr ve bir zîr-i zemîni ve bir fırın ve üç mahâlde mâ-i cârîyi hâvî kanavât-ı memlûkeyi ve bir havuzu ve bir su harkını ve cüneyneyi hâvî ve hâriciyesi bir beyt-i süflî ve bir sofa ve iki beyt-i ulvî ve bir ahır ve mâ-i cârîyi hâvî kanavât-ı memlûkeyi ve cüneyneyi müştemil bin kıt‘a esedî guruşa mukavvem olup müteveffât-ı ûlâ Fâtıma Hatun’un mecmû‘-ı menzil-i mezbûrda olan sülüs-i şâyi‘ hissesi bi-tarîkı’l-münâsahati’l-mezkûre yirmi sehm i‘tibâr olunup sihâm-ı mezbûreden dört sehmi sagīre-i mezkûreye ve bir sehmi merkūme Şerife Rahime Hatun’a ve on sehmi mezbûr Derviş Ali Efendi’ye ve beş sehmi mezkûre Âişe Hatun’a intikāl ve müteveffâ-yı sânî Mustafa Efendi’nin dahi mecmû‘-i menzil-i mezkûrede olan sülüs-i şâyi‘ hissesi sekiz sehm i‘tibâr olunup sihâm-ı mezbûreden bir sehmi merkūme Şerife Rahime Hatun’a ve dört sehmi sagīre-i mezkûreye ve iki sehmi mezbûr Derviş Ali Efendi’ye ve bir sehmi merkūme Âişe’ye isâbet eylemiş idi, menzil-i mezkûr harâba müşrif olduğundan mâ‘adâ âhar diyârda olmağla sagīre-i mezkûrenin hissesinin dahli harcına vefâ etmemeğin hissesi bey‘ ve semeni irbâh olunmak her vechile sagīre-i mezkûre hakkında enfa‘ ve ahrâ olmağın ba‘de’l-müzâyede ve inkıtâ‘ı’r-rağbe sagīre-i mezkûrenin hissesi semen-i misli olan iki yüz otuz buçuk esedî guruşda ve müvekkile-i merkūme Şerife Rahime Hatun’un hissesi elli yedi buçuk esedî guruşda mezbûr Derviş Ali Efendi üzerinde karâr edip ziyâde ile âhar tâlib zuhûr etmemeğin vekâlet-i mahkiyem hasebiyle bi-cümleti’t-tevâbi‘ ve’l-levâhık sagīre-i mezkûrenin hissesini iki yüz otuz buçuk esedî guruşa ve müvekkile-i mûmâ-ileyhânın hissesini dahi elli yedi buçuk esedî guruşa mezbûr Derviş Ali Efendi’ye bâtten bey‘ ol dahi minvâl-i muharrer üzere iştirâ eyledikden sonra cem‘an semenleri olan iki yüz seksen sekiz esedî guruşu tamamen bi’l-vekâle mezbûr Derviş Ali Efendi yedinden alıp kabz edip mebî‘-i mezkûru mahâllinde kabz ve tasarrufa mezbûr Derviş Ali Efendi’yi bi’l-vekâle taslît eyledim dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ba‘dehû meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’s-sâdis ve’l-işrîn min-Recebi’l-ferd li-sene isnâ ve seb‘în ve elf Şuhûdü’l-hâl: es-Sâbıkūn