İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 250 Hüküm no: 211 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Kudüs Kadısı Mustafa Efendi b. Abdullah Çavuş’un varislerinden Derviş Ali Efendi’nin Baba Hasan İlmi mahallesindeki arsa ile Bursa’daki ev, bağ ve bahçedeki hisselerini merhumun zevcesi Şerife Rahime Hatun’a devretmesi Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Kirmasti mahallesinde vâki‘ Ali Efendizâde Mehmed Bahri Efendi’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde sâbıkā Kuds-i Şerîf kādısı olup vefât eden merhûm Mustafa Efendi b. Abdullah’ın verâseti zevce-i metrûkesi fahrü’l-muhadderât Şerife Rahime Hatun bt. el-merhûm Esad Efendi’ye ve sulbiye sagīre kızı Râbia’ya ve li-ebeveyn er karındaşı Derviş Ali Efendi’ye ve li-ebeveyn kız karındaşı Âişe Hatun’a münhasıra olduğu ve tashîh-i meselesi sekiz sehimden olup bir sehmi mezbûre Şerife Rahime Hatun’a ve dört sehmi sagīre-i mezbûreye ve iki sehmi mezbûr Derviş Ali Efendi’ye ve bir sehmi kız karındaşı mezbûre Âişe Hatun’a intikāl eylediği şer‘an zâhir ve mütehakkık oldukdan sonra mezbûr Derviş Ali Efendi meclis-i ma‘kūd-i mezbûrda işbu kitâbın hâfizası merkūme Şerife Rahime Hatun tarafından husûs-ı câ’i’z-zikre vekîl olup vekâleti li-ebeveyn karındaşları umdetü’l-ulemâi’l-izâm Mehmed Said Efendi ve fahrü’l-müderrisîn es-Seyyid Ebussuûd Efendi şehâdetleri ile şer‘an vekâleti sâbite olan ekmelü’l-müderrisîn Habilzâde Ömer Efendi mahzarında ikrâr ve takrîr-i kelâm edip mûrisim müteveffâ-yı mezbûr Mustafa Efendi’nin ile’l-vefât silk-i mülkünde olup mahmiye-i mezbûrede Baba Hasan İlmî mahallesinde vâki‘ lede’l-ahâlî ve’l-cîrân tecdîd ve tavsîfden müstağnî ve bin yetmiş Zilka‘desinin on altıncı gününde harîk-ı gālibde muhterik bir hamam ve iki bi’r-i mâ ve bir mahzen ve iki tarafında ( ) arşın taş duvarı ve sed üzerinde Haydarhâne Vakfı’ndan mukāta‘alı bir mikdâr arsayı hâvî bin üç yüz kıt‘a esedî guruşa merkūm menzil arsasında olan iki sehm hisse-i şâyi‘amı dahi Bursa kazâsına tâbi‘ Çeltik nâm karyede vâki‘ buyût-ı adîdeyi ve iki kıt‘a bağçe ve üç kıt‘a bağı müştemil dört yüz elli kıt‘a esedî guruşa mukaddem çiftlik ta‘bîr olunur mülk menzil ve bağ ve bağçede olan kezâlik iki sehm hisse-i şâyi‘amı bi-safkatin vâhidetin dört yüz otuz yedi kıt‘a esedî guruş ve bir sülüs guruşa tarafeyden îcâb ve kabûlü hâvî bey‘-ı bâtt-ı sahîh-i şer‘î ile mezbûr Ömer Efendi’ye bey‘ ol dahi müvekkilesi mezbûre Şerife Rahime Hatun mâlıyla müvekkilesi için minvâl-i muharrer üzere iştirâ eyledikden sonra semeni olan meblağ-ı mezbûr dört yüz otuz yedi kıt‘a esedî guruşu ve bir sülüsü vekîl-i mezbûr Ömer Efendi yedinden bi’t-tamam ve’l-kemâl kabz edip çiftlik-i mezbûrda olan hisse-i merkūmeyi mahâllinde kabz ve tasarrufa müvekkile-i mezbûreyi taslît eyledim ba‘de’l-yevm mahmiye-i mezbûrede olan menzil arsası ile çiftlik-i mezbûrda hak ve alâka ve medhalim kalmadı keyfe mâ teşâ ve tahtâr mutasarrıf olsun dedikde mukırr-ı mezbûru kelimât-ı meşrûhasında vekîl-i mezbûr Ömer Efendi bi’l-muvâcehe tasdîk ve bi’l-müşâfehe tahkīk eyledikde mevlânâ-yı mezbûr mahâllinde tahrîr ve ba‘dehû meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’s-sâdis ve’l-işrîn min-Recebi’l-ferd li-sene isnâ ve seb‘în ve elf Şuhûdü’l-hâl: es-Sâbıkūn