İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 251 Hüküm no: 212 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âşık Paşa Şeyhi Mehmed Efendi’nin kızı Sâliha Hatun’un, cariyesi Şahbaz bt. Abdullah’ı azat etmesi Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mehmed Efendi irsâl olunup ol dahi mahmiye-i İstanbul’da Âşık Paşa mahallesinde vâki‘ Âşık Paşa şeyhi merhûm es-Seyyid Mehmed Efendi’nin kerîmesi fahrü’s-sâlihât tâcü’l-muhadderât Sâliha Hatun’un menziline varıp zeyl-i kitâbda mastûrü’l-esâmî olan Müslimîn huzurunda akd-i meclis-i şer‘-i şerîf eyledikde müşârün-ileyhâ Sâliha Hatun’un zâtı ma‘rifet-i şer‘iye ile ârifân el-Hâc Yusuf b. İbrahim ve Mustafa Çelebi b. Şaban nâm kimesneler ma‘rifetleri ile mu‘arrefe oldukdan sonra meclis-i mezbûrda ikrâr-ı tâm ve takrîr-i kelâm edip işbu açık kaşlı kara gözlü orta boylu Abaziyyetü’l-asl Şahbaz bt. Abdullah nâm câriye-i memlûkemi tedbîr-i mutlak ile müdebber eyledim, bi-emrillâhi te‘âlâ kazâ-i nahb eylediğimde âzad olsun dedikde vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mehmed b. Rıdvan ile gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: es-Seyyid Lütfullah Efendi b. es-Seyyid Emrullah, Mustafa Çelebi b. Hamza, Mustafa Efendi b. Halil, Mehmed -el-fakīr ilâ rabbihi’l-gafûr-, el-Hâc Yusuf b. İbrahim, Mustafa Çelebi.