İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 252 Hüküm no: 213 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Hayreddin mahallesinden Raziye Hatun bt. Abdullah’ın mehrinin bir kısmını kocası Süleyman Dede’ye hibe etmesi Mahmiye-i İstanbul’da Hoca Hayreddin mahallesinde sâkine Râziye Hatun bt. Abdullah tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân Mustafa Çelebi b. Hüseyin ve Mustafa Bey b. Hızır şehâdetleri ile şer‘an vekâleti sâbite olan İshak Bey b. Hasan meclis-i şer‘de işbu râfi‘u’l-kitâb müvekkile-i mezbûrenin zevci Süleyman Dede b. Şahin mahzarında bi’l-vekâle ikrâr ve takrîr-i kelâm edip müvekkile-i mezbûre Râziye zevci mezbûr Süleyman Dede zimmetinde olan bin akçe mehr-i mü’eccelinden dokuz yüz akçesini zevcim mezbûr Süleyman Dede’ye hîbe eyledim bâkīsi olan yüz akçe ve üzerimde lâbis olduğum esvâbımdan gayrı ism-i mâl ıtlâk olunur bir şeyim yokdur, sâkine olduğum menzil içinde her ne var ise zevcim mezbûr Süleyman Dede’nin mülküdür, benim alâkam yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Hüseyin Efendi el-imâm, Hüseyin Çelebi el-müezzin, Mumcu İbrahim Beşe b. Nasuh, Osman Beşe b. Mustafa, Çavuş b. Mehmed, Bekdaş b. Yahya.