İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 252 Hüküm no: 214 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Hayreddin mahallesinden Raziye Hatun bt. Abdullah’ın ev eşyalarını üvey oğlu İbrahim’e hibe etmesi Mahmiye-i İstanbul’da Hoca Hayreddin mahallesinde sâkine Râziye Hatun bt. Abdullah tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân Mustafa Çelebi b. Hüseyin ve Mustafa Bey b. Hızır şehâdetleri ile şer‘an vekâleti sâbite olan İshak Bey b. Hasan meclis-i şer‘de işbu râfi‘u’l-kitâb İbrahim b. Süleyman mahzarında bi’l-vekâle ikrâr ve takrîr-i kelâm edip müvekkilem mezbûre Râziye silk-i mülkünde olan iki yorgan ve iki köhne döşek ve iki köhne kaliçe ve iki köhne minder ve dört köhne yasdık ve bir kebîr leğen ve dört sahan ve üç tencere ve bir kebîr sini ve iki yahni tebsisi ve iki hoşâb tası ve bir güğüm ve bir kazgan ve bir köhne sandık ve bir bogāsi sâde ve iki bogāsı zıbın ve iki bakraç ve bir ibriğini üveyi oğlu mezbûr İbrahim’e hîbe ve temlîk ve teslîm ol dahi meclis-i hîbede ittihâb ve tesellüm ve temellük ve kabûl edip ivazan ani’l-hibeti’l-mezkûre müvekkilem mezbûr İbrahim bir siyah sadef verip müvekkilem dahi ivaz olmak üzere ol sadefi yedinden ahz u kabz eyledi, ba‘de’l-yevm eşyâ-i merkūme mezbûr İbrahim’in mülk-i mevhûbesidir, müvekkilemin alâkası yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: es-Sâbıkūn