İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 253 Hüküm no: 215 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenikapı’daki meyhanecilerden Manol v. Yorgi’nin Kartina kazasındaki Valide Sultan Vakfı’na reaya kaydolunduğundan kendisinden vergi istenmemesi Vilâyet-i Rumeli’nde Mora sancağında Kartina kazâsına tâbi‘ Korkoşile? nâm karyenin sipâhisi olan Mustafa Ağa b. Abdullah tarafından husûs-ı âti’l-beyânı da‘vâya sâbitü’l-vekâle vekîli ve subaşısı olan İbrahim Ağa b. Mahmud nâm kimesne mahfil-i kazâda mahmiye-i İstanbul’da Yenikapı hâricinde sâkin meyhâneci tâifesinden işbu râfi‘u’s-sifr Manol v. Yorgi mahzarında üzerine bi’l-vekâle da‘vâ ve takrîr-i kelâm edip ben gāib-i mezbûr Mustafa Ağa’nın yedinde olan temessükü mûcebince karye-i mezbûrenin subaşısı olmağla mezbûr Manol karye-i mezbûre re‘âyâsından olup târih-i kitâb senesi cânib-i sipâhiye edâsı üzerine lâzım gelen ispençe ve sâir tekâlîfi vekâletim hasebiyle taleb ederim, suâl olunsun dedikde gıbbe’s-suâl mezbûr Manol cevâbında ben târih-i kitâbdan yirmi bir sene mukaddem yedimde olan emr-i şerîf mûcebince mahrûse-i Üsküdar’da vâki‘ merhûme Vâlide Sultan Vakfı’nda ra‘iyyet kaydolunup yedime sûret-i defter dahi verilmişdir deyü emr-i şerîf ve sûret-i defter-i vakf ibrâz edip kırâet olundukda fi’l-hakīka mezbûr Manol zikrolunan emr-i şerîf mûcebince vakf-ı mezbûr re‘âyâsından kaydolunduğu mukarrer sûret-i defter-i vakıfda dahi mezkûr Manol’un ismi mastûr olmağın vekîl-i mezbûr İbrahim Ağa bî-vech mu‘ârazadan men‘ birle mâ-vaka‘a bi’t-taleb ketb olundu. Fi’s-sâmin aşer min-Şa‘bâni’l-mu‘azzam sene 1072 Şuhûdü’l-hâl: el-Hâc Ahmed b. Mahmud, Şükrullah b. Mustafa, Baba Rasûl b. Rıdvan, Abdi b. Hüseyin.