İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 254 Hüküm no: 216 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tire’de Mustafa b. Receb’i öldürdüğü iddia edilen İbrahim Ağa b. Feridun’la maktûlün mirasçıları arasında sulh akdi yapılması Vilâyet-i Anadolu’da Tire kazâsına tâbi‘ Alıklı nâm karyede mecrûhen fevt olan Mustafa b. Receb’in verâseti zevce-i metrûkesi Emine bt. Hızır ve sulbî sagīr oğlu Mehmed’e münhasıra olduğu şer‘an zâhir ve müte‘ayyen oldukdan sonra sagīr-i mezbûrun kıbel-i şer‘den mansûb vasîsi ve mezbûre Emine tarafından vekîl olup mezbûrenin zâtını ma‘rifet-i şer‘iye ile ârifân olan Abdülcelil Bey b. Resül ve Mehmed b. Bali şehâdetleri ile şer‘an vekâleti sâbite olan Veli b. Veli nâm kimesne meclis-i şer‘de işbu bâ‘isü’l-kitâb İbrahim Ağa b. Feridun tarafından vech-i âtî üzere husûmet ve redd-i cevâba ve lâzım gelirse sulha ve bedel-i sulhu îfâya vekîl-i müsecceli olan Ebûbekir Bey b. Mustafa mahzarında vesâyeten ve vekâleten ikrâr u i‘tirâf edip müvekkili mezbûr İbrahim Ağa merkūm Mustafa’yı karye-i mezbûrede değnek ile başına vurup mecrûh etmekle andan nâşî fevt olmuşdur deyü mezbûr İbrahim Ağa’dan mukaddemâ mûcebini da‘vâ ve taleb eylediğimde ol dahi bi’l-külliye inkâr edip ben dahi müdde‘âmı isbâta kādir olmayıp aczim müte‘ayyen ve sulh sagīr hakkında enfa‘ olmağın da‘vâ-yı mezbûreden vekîl-i mezbûr benimle yirmi bin akçe üzerine inşâ-i akd-i sulh eyledikde ben dahi ba‘de’l-kabûl bedel-i sulh-ı mezbûru bi’t-tamam vekîl-i mezbûr yedinden ahz u kabz edip husûs-ı mezbûra müte‘allika da‘vâdan müvekkil-i mezbûrun zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam sene isnâ ve seb‘în ve elf Şuhûdü’l-hâl: Esad Efendi b. Abdurrahman, el-Hâc Receb b. Halil, Ahmed Efendi, el-Hâc Musa b. İsa, Mehmed b. el-Hâc Ahmed, Mehmed b. Hasan, Mehmed b. el-Hâc Ahmed, el-Hâc Abdülaziz.