İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 254 Hüküm no: 217 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Delot bt. Mihran’ın oğlu Karabet v. Toros’un bazı eşya ve alacakların annesine ait olduğuna dair beyanı Husûs-ı âti’l-beyânın mahâllinde tahrîri için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Seferikoz mahallesinde Delot bt. Mihran nâm Ermeniyenin sâkine olduğu menziline varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mezkûre Devlet’in sadrî kebîr oğlu Karabet v. Toros nâm Ermeni meclis-i ma‘kūd-ı mezbûr[da] vâlidesi merkūme Delot muvâcehesinde ikrâr ve takrîr-i kelâm edip mahmiye-i mezbûrede Vâlidehânı’nda sâkin Agop nâm zimmî zimmetinde olan bin iki yüz riyâlî guruş ve Mustafa Paşa Çarşısı’nda Habbâz Arzuman zimmetinde olan yüz kıt‘a riyâlî guruş ve yine habbâz tâifesinden Kulaksız Bogos nâm Ermeni zimmetinde olan altı yüz riyâlî guruş ve medîne-i Galata’da Karaköy kapısı dâhilinde sâkin Karakaş ve şerîkleri Karayani ve diğer Karayani zimmetlerinde olan altı yüz riyâlî guruş ve yine medîne-i mezbûrede habbâz tâifesinden diğer Arzuman zimmetinde olan yüz guruş ki, cem‘an iki bin altı yüz riyâlî guruş ile beş aded beledî döşek ve on aded yorgan-ı beledî ve üç kebîr kazgan ve yedi aded tencere ve üç demir sini ve kırk aded lengerî ve tepsi ve sahan ve üç bakraç ve levn [ve] kıymetleri beynimizde ilm-i şer‘î ile ma‘lûm on üç re’s atın vâlidem merkūme Devlet’in mülküdür, benim alâka ve medhalim yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Abdi Çelebi b. Halil ile meclis-i şer‘e gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam sene isneyn ve seb‘în ve elf Şuhûdü’l-hâl: Mehmed Efendi b. Mustafa el-imâm, Ahmed Efendi b. el-Hâc Mehmed el-imâm, Abdülkadir Beşe b. Abdülvehhab, Murad Beşe b. Mustafa, Şaban Beşe b. Kasım, el-Hâc Mehmed b. Süleyman, el-Hâc Mehmed b. el-Hâc Eyyüb, Sakazâde Mehmed Çelebi b. Sefer, Ahmed Çelebi b. ( ) el-Bevvâb-ı Sultanî, Mehmed Çelebi el-kayyûm ve gayruhum.