İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 255 Hüküm no: 218 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerağî Hamza mahallesinden Yusuf b. Abdullah’ın Ahmed b. Mehmed Çavuş’un evine girip parasını çalması Vilâyet-i Rumeli’nde Eğriboz sancağında vâki‘ Kızılhisar kasabası sükkânından olup hâlâ mahmiye-i İstanbul’da Çerâğī Hamza mahallesinde sâkin işbu bâ‘isü’l-kitâb Ahmed Efendi b. Mehmed Çavuş mahfil-i kazâda Yusuf b. Abdullah nâm kimesne muvâcehesinde üzerine da‘vâ ve takrîr-i kelâm edip işbu târih-i kitâb günü ben taşra gittiğimde mezbûr Yusuf menzilime girip benim hizmetkârım olan Ömer b. Mahmud nâm şâbb-ı emredi bıçak ile dört yerden vurup hal‘ eyledikden sonra benim sepetimi kırıp içinde mevcûd olan eşyâmdan yüz yirmi şerîfî altın ve otuz riyâlî guruş ve kırk esedî guruş ve dört bin akçe ve bir sâde çerkesî raht ve bir zeytûnî sadefimi almışdır, hâlâ mezbûr Yusuf’dan suâl olunup mûcebi icrâ olunmak matlûbumdur dedikde gıbbe’s-suâl mezbûr Yusuf cevâbında fi’l-hakīka târih-i kitâb günü müdde‘î-i mezbûrun menziline gāib ani’l-meclis Çâker ile ma‘an varıp eşyâ-yı merkūmeyi ahz eylediğimizde nısfını ben ve nısf-ı âharını mezbûr Çâker ahz u kabz edip meblağ-ı mezbûr ile eşyâ-yı mezkûreyi sana teslîm etdim deyü bi-tav‘ihiikrâr, lâkin merkūm Ömer’i ben katleylemedim mezbûr Çâker katleyledi deyü kendi katleylediğini inkâr edicek, ikrârı mûcebince meblağ-ı mezbûr ile eşyâ-yı merkūmemi müdde‘î-i mezbûra teslîme merkūm Yusuf’a tenbîh birle mâ-vaka‘a bi’t-taleb ketb olundu. Fi’l-yevmi’l-işrîn min-Şa‘bâni’l-mu‘azzam sene isneyn ve seb‘în ve elf Şuhûdü’l-hâl: Mahmud Efendi b. Muharrem el-imâm, Süleyman Efendi b. el-Hâc Hüseyin, Abdülkadir Halîfe b. Hüseyin el-müezzin, Mustafa Çelebi b. Ahmed, Mehmed Çelebi b. Şaban Efendi, Mehmed Beşe b. Abdullah.